سيفرلاندىرۋ الەمدەگى ورنىقتى دامۋ ينديكاتورلارىنىڭ 70 پايىزىنا ىقپال ەتەدى
استانا. KAZINFORM - بۇگىن پارلامەنت سەناتىندا قازاقستاننىڭ ورنىقتى دامۋى سالاسىنداعى ۇلتتىق ماقساتتار مەن مىندەتتەردىڭ ىسكە اسىرىلۋىن مونيتورينگىلەۋ جونىندەگى پارلامەنتتىك كوميسسيانىڭ XI وتىرىسى ءوتىپ جاتىر.
- بۇگىن ورنىقتى دامۋ ماقساتتارىنا قول جەتكىزۋگە تسيفرلىق وزگەرىستەردىڭ اسەرى تۋرالى ماسەلەلەردى تالقىلايمىز. وزدەرىڭىزگە بەلگىلى، پرەزيدەنت قاسىم-جومارت توقايەۆ ءۇش جىل ىشىندە قازاقستاندى جاپپاي سيفرلىق ەلگە اينالدىرۋدى مىندەت ەتىپ جۇكتەدى. وسىعان بايلانىستى ۇكىمەت سيفرلاندىرۋ ءىسى مەن جاساندى ينتەللەكتىنى دامىتۋعا ارنالعان Digital Qazaqstan ءبىرتۇتاس ستراتەگياسىن ازىرلەپ، ونى جوسپارلى تۇردە ىسكە اسىرۋعا ءتيىس. شىن مانىندە، سيفرلاندىرۋ - cross-sector-لىق پروتسەسس. ول ەڭ الدىمەن، ەلدىڭ ورنىقتى دامۋىنىڭ كاتاليزاتورى جانە ىرگەلى فاكتورى ەكەنى انىق. سيفرلىق تەحنولوگيالار - ەكونوميكانىڭ باسەكەگە قابىلەتتىلىگىنىڭ جانە ازاماتتاردىڭ ءومىر ءسۇرى ساپاسىن ارتتىرۋدىڭ ماڭىزدى تەتىگى. سيفرلىق تەحنولوگيالار ينكليۋزيۆتى ءبىلىم بەرۋ مەن ساپالا دەنساۋلىق ساقتاۋدى ايتارلىقتاي دامىتۋعا دا ىقپال ەتە الاتىنى ءسوزسىز. سونداي-اق گەندەرلىك تەڭدىكتى، تەڭگەرىمدى ەكونوميكالىق ءوسۋدى جانە قورشاعان ورتانى قورعاۋدى قامتاماسىز ەتەتىن شارالاردى كۇشەيتەدى، - دەدى سەنات ءتوراعاسى ماۋلەن اشىمبايەۆ.
وسى ورايدا سەنات ءتوراعاسى تسيفرلاندىرۋ قارجىلىق ينكليۋزيانى قامتاماسىز ەتۋدە مەملەكەتتىك باسقارۋدىڭ تيىمدىلىگىن ارتتىرۋدا ماڭىزدى ءرول اتقارادى. وسىنىڭ ءبارىن ەسكەرىپ، ساراپشىلار سيفرلاندىرۋ الەمدەگى ورنىقتى دامۋ ماقساتتارىنىڭ نەگىزگى ينديكاتورلارىنىڭ 70 پايىزىنا قول جەتكىزۋگە ىقپال ەتەتىنىن ايتىپ وتىر. ۇلتتىق ەكونوميكا مينيسترلىگىنىڭ دەرەكتەرى بويىنشا ەلىمىزدەگى ورنىقتى دامۋ ماقساتتارىنىڭ 93 پايىزى ەلەكتروندى پلاتفورمالار ارقىلى باقىلانادى.
- جالپى، قازاقستاندا IT- ەكوجۇيە حالىقارالىق دەڭگەيدە دامىپ كەلە جاتقانىن ءبارىمىز بىلەمىز. ءبىراق، وعان توقمەيىلسۋگە بولمايدى. سيفرلىق وزگەرىس ورنىقتى دامۋ ماقساتتارىنا قول جەتكىزۋگە ءوزىنىڭ تىكەلەي جانە سومدى ۇلەسىن ءىس جۇزىندە قوسۋى كەرەك. سوندىقتان سيفرلىق شەشىمدەردى ولار ناتيجە بەرەتىن، تيىمدىلىكتى ءارى اشىقتىقتى جانە ازاماتتاردىڭ ءومىر ءسۇرۋ ساپاسىن ارتتىراتىن جەرلەردە پايدالانۋ ايرىقشا ماڭىزعا يە. بۇل سالادا ءتيىمدى قۇقىقتىق بازا قاجەت. وسى ماقساتپەن سەنات قازىر «جاساندى ينتەللەكت تۋرالى» زاڭدى قاراپ جاتىر. ول جاڭا تەحنولوگيالاردى باسقارۋدىڭ جانە دامىتۋدىڭ زاڭنامالىق بازاسىن قالىپتاستىرۋعا ارنالعان. سونداي-اق، پارلامەنتتە سيفرلىق كودەكستىڭ جوباسى بەلسەندى تالقىلانىپ جاتقانىن اتاپ وتكەن ءجون. بۇل قۇجات - سيفرلىق قۇقىقتىق قاتىناستاردىڭ نەگىزگى ەرەجەلەرىن بەلگىلەيتىن العاشقى كەشەندى زاڭنامالىق اكتى بولادى دەپ كۇتىلۋدە. جالپى، دەپۋتاتتىق كورپۋس قازاقستاندا ورنىقتى دامۋ ماقساتتارىن جانە سيفرلىق كۇن ءتارتىبىن ىلگەرىلەتۋ جولىندا جۇيەلى جۇمىس جۇرگىزىپ كەلەدى، - دەدى ماۋلەن اشىمبايەۆ.
بۇدان بۇرىن حابارلانعانداي، وقۋشىلار اراسىندا العاش رەت قارجىلىق ساۋاتتىلىق پەن سيفرلىق قاۋىپسىزدىك وليمپياداسى وتەدى.
اۆتور
رۋسلان عابباسوۆ
