سپورتتى جەلەۋ ەتىپ، اۋىر قىلمىستار جاساعان توپتىڭ ارەكەتى توقتاتىلدى
استانا. KAZINFORM - قاراعاندى وبلىسىندا پوليتسيا وڭىردەگى كريمينوگەندىك احۋالعا كەرى اسەر ەتكەن توپتىڭ قىزمەتىن توقتاتۋعا باعىتتالعان جەدەل-تەرگەۋ ءىس-شارالارىنىڭ كەشەنىن جۇرگىزدى.
بۇل تۋرالى ءى ءى م باسپا ءسوز قىزمەتى ءمالىم ەتتى.
- جەدەل ازىرلەمە بارىسىندا توپ مۇشەلەرىنىڭ ءبىرى سپورت سالاسىنداعى بەدەلىن پايدالانىپ، سپورتتى قولداۋ جانە دامىتۋ دەگەن سىلتاۋمەن جاستاردى اۋىر جانە اسا اۋىر قىلمىستار جاساۋعا تارتقانى انىقتالدى. ۇرلىق، بوپسالاۋ، الاياقتىق جانە توناۋ فاكتىلەرى بويىنشا التى قىلمىستىق ءىس قوزعالدى. قابىلدانعان شارالار مەن جەدەل ارەكەتتەر ناتيجەسىندە 20 ادام ۇستالدى. 47 سانكسيالانعان ءتىنتۋ جۇرگىزىلىپ، زاڭسىز اينالىمنان اتىس جانە سۋىق قارۋلار، وق-دارىلەر، اۆتوكولىكتەر، ءىرى كولەمدە اقشا، ونىڭ ىشىندە شەتەل ۆاليۋتاسى، سونداي-اق قىلمىستىق ىستەر ءۇشىن ماڭىزى بار وزگە دە زاتتاي دالەلدەمەلەر تاركىلەندى. توپتىڭ زاڭسىز ارەكەتى وزدەرىنىڭ قىلمىستىق ىقپالىن كەڭەيتۋگە، سونىڭ ىشىندە جاستاردى تارتۋعا جانە زورلىق-زومبىلىق قىلمىستارىن جاساۋعا باعىتتالعان. ۇستالعانداردىڭ باسقا دا قىلمىستارعا قاتىسى بار جوعى تەكسەرىلۋدە. بۇل باعىتتاعى جۇمىس جالعاساتىن بولادى، - دەدى ءى ءى م ۇيىمداسقان قىلمىسقا قارسى كۇرەس دەپارتامەنتىنىڭ وكىلى قۋاندىق الپىس.
بۇعان دەيىن ق م ا باتىس قازاقستان وبلىسى بويىنشا دەپارتامەنتى ازاماتتاردىڭ بانك شوتتارىنا زاڭسىز قول جەتكىزىپ، قىلمىستىق قارجى وپەراتسيالارىن جۇزەگە اسىرعان توپتىڭ ارەكەتىن توقتاتقانىن جازدىق.
