سپورتشىلارىمىز وليمپيادانىڭ 11-كۇنى قانداي ەرەكشەلىكتەرىمەن ەستە قالدى

پاريج. KAZINFORM - فرانسيا استاناسى پاريج قالاسىندا ءوتىپ جاتقان وليمپيادا ويىندارى بەل ورتاسىنان اۋىپ بارادى. قازاق سپورتشىلارى ءۇشىن اسا ءساتتى بولعان كۇن دەسەك قاتەلەسپەيمىز.

ناقتىراق ايتساق، ايەلدەر بوكسىنان 50 كەلى سالماقتا نازىم قىزايباي وليمپيادا ويىندارىنىڭ قولا جۇلدەگەرى اتاندى. ول وكىنىشكە قاراي، جارتىلاي فينالدا قىتايلىق ۆۋ يۋعا جول بەرىپ الدى. الايدا، ەلگە قۇر قايتپايدى. مويىنىندا پاريج وليمپياداسىنىڭ قولا مەدالى بار.

سونىمەن قاتار كەشەگى تاعى ءبىر اسا ماڭىزدى جەڭىستەردىڭ ءبىرى - گرەك-ريم كۇرەسىنەن ۇلتتىق قۇراما مۇشەسى 77 كەلى سالماقتاعى دەمەۋ جادىرايەۆتىڭ فينالعا شىعۋى. ول جارتىلاي فينالدا ءازىربايجان وكىلى سانان سۋلەيمانوۆتان باسىم ءتۇستى. ەندى جادىرايەۆ وليمپيادانىڭ التىنى ءۇشىن سىنعا تۇسەدى.

6 - تامىزداعى تاعى ءبىر ەرەكشە اتاپ وتەر جاڭالىقتاردىڭ ءبىرى - قۇزعا ورمەلەۋ سپورتىنان وتانداسىمىز ءامىر مايمۇراتوۆتىڭ وليمپيادا رەكوردىن جاڭارتۋىمەن ەستە قالدى. ول ەرلەر اراسىندا جىلدامدىققا قۇزعا ورمەلەۋدەن ارالىق كەزەڭدە ا جولاعىندا 4,89 سەكۋند ناتيجەسىن كورسەتتى. وسىلايشا قازاقستاندىق سپورتشى وليمپيادا رەكوردىن جاڭارتتى.

ال بۇعان دەيىنگى وليمپيادا رەكوردى فرانسيالىق ماۆەم باسساعا تيەسىلى بولاتىن. ول 2021 -جىلى توكيودا (جاپونيا) وتكەن وليمپيادا ويىندارىندا جىلدامدىققا قۇزعا ورمەلەۋدەن 5,45 سەكۋندتى تىركەگەن بولاتىن.

ال بايداركا مەن كانوەدە ەسۋدەن 500 مەترگە جارىستا بەكارىس راماتۋللا مەن سەرگەي توكارنيتسكي جۇبى ءوز توبىندا مارەگە بەسىنشى جەتتى. ۋاقىت كورسەتكىشى - 1:38.62 سەكۋند.

كانوەدە 500 مەترگە ەسكەك ەسۋدە ماريا بروۆكوۆا مەن رۋفينا يسكاكوۆا جۇبى ءوز توبىندا 5-ورىن الدى. ولاردىڭ ۋاقىت كورسەتكىشى - 2:00.05 سەكۋند. كانوەدە 500 مەترگە ەسكەك ەسۋدە سەرگەي ەمەليانوۆ پەن تيمۋر حايداروۆ جۇبى ىرىكتەۋدە ءوز توبىندا مارەگە 5- جەتتى.

ۋاقىت كورسەتكىشى - 1:45.94 سەكۋند. جەڭىل اتلەتيكادان داۆيد ەفرەموۆ 110 مەترگە كەدەرگىلەر ارقىلى جۇگىرۋدىڭ جۇبانىش كەزەڭىندە سورەدەن دۇرىس شىقپاعانى ءۇشىن (فالستارت) جارىستان شەتتەتىلدى.

ال قازاق ەلى تاعى ءبىر مەدالدان باستى ۇمىتكەر ساناعان قازاقتىڭ «قارا مارجانى» اتانىپ كەتكەن نورا دجەرۋتو 3000 مەترگە كەدەرگىلەر ارقىلى جۇگىرۋدىڭ فينالىندا مارەگە 9- بولىپ جەتتى. ۋاقىت كورسەتكىشى - 9:08.97 سەكۋند. وسىلايشا ول وليمپيادا ويىندارىن جۇلدەسىز اياقتادى. وليمپيادانىڭ 11- جارىس كۇنىنەن كەيىن قازاقستان قۇراماسىنىڭ قورجىنىندا 1 التىن، 1 كۇمىس، 3 قولا جۇلدە بار. ال جالپى مەدالدار كەستەسىندە 30-ورىندا كەلەدى.

اۆتور

كۇنسۇلتان وتارباي