سپورت سالاسىندا تىكەلەي بىرىكتىرىلگەن باسقارۋ جۇيەسى ەنگىزىلمەك

استانا. KAZINFORM - الداعى ۋاقىتتا مەملەكەتتىك بيۋدجەتتەن قارجىلاندىرىلاتىن سپورت تۇرلەرى «نەگىزگى»، «مەدالدىق» جانە «ۇلتتىق» بولىپ ءۇش ساناتقا بولىنەدى. بۇل تۋرالى ءماجىلىس دەپۋتاتتارىنىڭ ساۋالىنا پرەمەر- مينيستر ولجاس بەكتەنوۆتىڭ جاۋابىندا ايتىلعان.

«قازاقستان حالقىنا جولداۋىندا جانە 2024 -جىلعى 27-تامىزدا وليمپيادا ويىندارىنىڭ جۇلدەگەرلەرىمەن كەزدەسۋ كەزىندە مەملەكەت باسشىسى بەرگەن تاپسىرمالارعا سايكەس ۇكىمەت سپورتتى دامىتۋ بويىنشا بىرنەشە جۇيەلى شارالاردى اسىرۋدى قولعا الدى. قازىرگى تاڭدا زاڭ جوباسى (قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنە شىنىقتىرۋ جانە سپورت ماسەلەلەرى بويىنشا وزگەرىستەر مەن تولىقتىرۋلار ەنگىزۋ، سونداي- اق نورمالاردىڭ ارتىق (شامادان تىس) زاڭنامالىق رەگلامەنتتەلۋىن بولدىرماۋ تۋرالى زاڭ جوباسى) ازىرلەندى. زاڭ جوباسى مەملەكەتتىك بيۋدجەتتەن قارجىلاندىرىلاتىن سپورت تۇرلەرىن ءۇش ساناتقا بولەدى: نەگىزگى، مەدالدىق جانە ۇلتتىق سپورت تۇرلەرى. سونداي- اق كاسىپقوي كوماندالىق سپورت كلۋبتارىنا ارنالعان قارجىلاندىرۋ ليميتتەرىن بەكىتۋ جانە سپورتتىڭ باسىم تۇرلەرىن ايقىنداۋ قۇزىرەتى سپورت سالاسىنداعى ۋاكىلەتتى ورگانعا بەرىلەدى. بۇل رەتتە سپورت سالاسىندا تىكەلەي بىرىكتىرىلگەن باسقارۋ جۇيەسىن ەنگىزۋ كوزدەلىپ وتىر»، - دەدى ۇكىمەت باسشىسى جاۋابىندا.

ونىڭ ايتۋىنشا، اتالعان شارالار ۋاكىلەتتى ورگانعا وبلىستىق دەنە شىنىقتىرۋ جانە سپورتباسقارمالارىنىڭ باسشىلىلارىن، سپورتتىق ۇيىمداردىڭ باسشىلارىن، وبلىستىق اعا جاتتىقتىرۋشىلاردى تاعايىنداۋعا جانە قىزمەتتەن بوساتۋعا قۇزىرەت بەرەدى. سونىمەن قاتار باسىم سپورت تۇرلەرىنىڭ وڭىرلىك ءتىزىمىن بەكىتۋگە، وڭىرلىك سپورتتى قارجىلاندىرۋدى ءبىر جۇيەگە كەلتىرۋگە مۇمكىندىك تۋعىزادى.

«بۇگىندە بالالار مەن جاسوسپىرىمدەر سپورت مەكتەپتەرىندە 134 سپورت ءتۇرى دامىپ كەلەدى. ونىڭ 70 ءى جوعارى سپورت جەتىستىكتەرىنە (وليمپيادا، پاراليمپيادا جانە ازيا ويىندارىنىڭ سپورت تۇرلەرى)، 11 ءى ۇلتتىق سپورت تۇرلەرىنە جاتادى. ال قالعان 53 ءى جوعارىدا اتالعان سپورت تۇرلەرى باعدارلاماسىنا كىرمەيدى. بۇل بيۋدجەت قاراجاتىنىڭ باسىمدىق بەرىلمەيتىن سپورت تۇرلەرىنە جۇمسالۋىنا، تيىسىنشە، شاشىراڭقىلىققا اكەلەدى. وسىعان وراي قازىرگى شاشىراڭقى باسقارۋ جۇيەسىن وزگەرتۋ ماقساتىندا بالالار مەن جاسوسپىرىمدەر سپورت مەكتەپتەرىندە جان باسىنا شاققانداعى قارجىلاندىرۋ ادىستەمەسى ازىرلەنىپ جاتىر. بۇل بيۋدجەت شىعىندارىن وڭتايلاندىرۋدى قامتاماسىز ەتەدى جانە سپورت رەزەرۆىن دايىنداۋ ساپاسىن ارتتىرادى. سىزدەرمەن وسى نورمالاردى الداعى ۋاقىتتا تولىق تالقىلايتىن بولامىز»، - دەدى ولجاس بەكتەنوۆ.