سولتۇستىك قازاقستاندا تاعى ءبىر اۋىل ىشىمدىكتەن باس تارتتى
پەتروپاۆل. KAZINFORM - سولتۇستىك قازاقستان وبلىسى اققايىڭ اۋدانىنداعى دايىندىق اۋىلىنىڭ تۇرعىندارى اراق-شاراپتان تولىعىمەن باس تارتتى. سوڭعى ەكى جىلدان بەرى ەلدى مەكەندە بىردە-ءبىر اۋىر نەمەسە ۇرلىق، وتباسىلىق جانجالدار تىركەلمەگەن.
زارينا ايۋپوۆا دايىندىق اۋىلىنا 5 جىل بۇرىن وتباسىمەن كوشىپ كەلگەن.
«بۇل اۋىلدا اراق مۇلدەم ىشپەيدى، بوس جۇرگەن ادام جوق، بارلىعى جۇمىس ىستەيدى، دۇكەندە الكوگول ساتپايدى، بارلىعى ءوز شارۋاسىمەن اينالىسادى. ءبىزدىڭ اۋىل تىنىش»، - دەيدى اۋىل تۇرعىنى.
ءبىر كەزدەرى قۇرىپ كەتۋدىڭ از- اق الدىندا قالعان اۋىل قازىر وڭىردەگى ۇلگىلى ەلدى مەكەندەردىڭ قاتارىندا. «ۇزدىك 30 اۋىل» رەسپۋبليكالىق جوباسىندا ۇزدىكتەر قاتارىنان كورىندى. جەرگىلىكتى كاسىپكەر ءبىرجان شايمەردەنوۆ جۇمىس ورىندارىن قۇرىپ قانا قويماي، جۇمىسشىلارىنا جاڭا باسپانا تۇرعىزىپ جاتىر. سونداي-اق الەۋمەتتىك نىسانداردى دا تۇرعىزدى. الكوگولدەن تولىق باس تارتۋدى دا ۇسىنعان وسى كاسىپكەر.
«ءبىز مۇندا جۇمىس ىستەي باستاعاندا اۋىلدا 28 ءۇي عانا بولدى، قازىر ولاردىڭ سانى 80-نەن اسىپ وتىر. حالىق سانى - 315 ادام. ءبىز وتباسىلاردى وسىندا كوشۋگە شاقىرامىز، جۇمىس ورنىن ۇسىنامىز، ءوندىرىستى ارتتىرامىز»، - دەيدى ءبىرجان شايمەردەنوۆ.
جەرگىلىكى تۇرعىنداردىڭ بوس ۋاقىتىن ءتيىمدى وتكىزۋىنە، سپورتپەن شۇعىلدانۋىنا جاعداي جاسالعان. قازىر اۋىل مەكتەبىندە 97 وقۋشى ءبىلىم الادى. تۇلەكتەر اۋىلعا قاجەتتى ماماندىقتى مەڭگەرىپ، قايتىپ كەلىپ جاتىر.
دايىندىق اۋىلى قارايتىن لەنين اۋىلدىق وكرۋگىنە تاجىريبەلى ۋچاسكەلىك پوليتسيا ينسپەكتورى ءادي مۇقجانوۆ قىزمەت كورسەتەدى.
ىشكى ىستەر ورگاندارىندا ون جىلدان استام تاجىريبەسى بار. ونىڭ اۋىلداعى بۇگىنگى مىندەتى - سوڭعى ۋاقىتتا ءجيى تىركەلەتىن قىلمىس - ينتەرنەت- الاياقتىقتىڭ الدىن الۋ.
بۇعان دەيىن س ق و- دا تۇرعىنداردىڭ ازايۋىنا بايلانىستى 45 اۋىلدىڭ جابىلاتىندىعىن جازعان ەدىك.
اۆتور
اقەركە داۋرەنبەك قىزى
