سولتۇستىك قازاقستاندا اسكەرگە بارۋدان جالتارعان 750-گە جۋىق جىگىتكە ىزدەۋ جاريالانعان
پەتروپاۆل. KAZINFORM - سولتۇستىك قازاقستان وبلىسىندا بيىل كۇزدە 500-گە جۋىق جىگىت اسكەر قاتارىنا الىنۋى ءتيىس. ولاردىڭ العاشقى 10-ى بىرەر كۇندە وتان الدىنداعى بورىشىن وتەۋ ءۇشىن الماتىعا اتتانادى.
س ق و قورعانىس ىستەرى جونىندەگى دەپارتامەنتتىڭ مەرزىمدى اسكەري قىزمەتكە شاقىرۋ ءبولىمىنىڭ باستىعى ءانۋار يبرايەۆتىڭ ايتۋىنشا، قازىرگى ۋاقىتتا وبلىستا 14 مىڭنان استام جىگىت اسكەرگە شاقىرىلۋشى رەتىندە ەسەپكە الىنعان. بيىل كوكتەمدە س ق و- دان 478 جىگىت اسكەرگە الىنۋى ءتيىس بولسا، سونىڭ 436 جىبەرىلدى، جوسپار تەك %91 ورىندالدى.
«2- قىركۇيەكتەن باستاپ ەلىمىزدە كۇزگى اسكەرگە شاقىرۋ ناۋقانى باستالدى، ول جەلتوقسانعا دەيىن جالعاسادى. وڭىردەن 500-گە جۋىق ادام اتتانۋى ءتيىس. ولار ەلىمىزدىڭ بارلىق دەرلىك وڭىرلەرىندە مەرزىمدى اسكەري قىزمەتكە الىنادى. العاشقى 10 ادامدى 13-قىركۇيەك كۇنى الماتى وبلىسىنا جىبەرەمىز. ولار شەكارا قىزمەتىندە اسكەري بورىشىن وتەيدى»، - دەيدى ءانۋار يبرايەۆ.
ماماننىڭ ايتۋىنشا، قازىرگى ۋاقىتتا س ق و بويىنشا 743 ادام اسكەرگە بارۋدان جالتارىپ ءجۇر. ولارعا ىزدەۋ جاريالانعان.
«پوليتسيا دەپارتامەنتىمەن جۇمىس ىستەيمىز، ءتىزىمدى بەردىك. ۋچاسكەلىك پوليتسەيلەردىڭ كومەگىمەن ولاردىڭ جۇرگەن جەرىن انىقتايمىز. جالپى اسكەرگە بارۋدان قاشقاندارعا قىلمىستىق جانە اكىمشىلىك جازا قاراستىرىلعانىن ەسكە سالعىم كەلەدى. بەلگىلەنگەن كۇنى كەلمەسە 5 ا ە ك مولشەرىندە ايىپپۇل سالىنادى. ال مەديتسينالىق تەكسەرىستەن وتۋگە بارماسا ەسكەرتۋ الادى نەمەسە 3 ا ە ك مولشەرىندە ايىپپۇل قاراستىرىلعان. زاڭدىق نەگىزسىز اسكەرگە بارۋدان قاشسا 1 مىڭ ا ە ك مولشەرىندە ايىپپۇل سالىنادى نەمەسە 400 ساعاتقا قوعامدىق جۇمىسقا جەگىلەدى. سونداي-اق 1 جىلعا دەيىن باس بوستاندىعى شەكتەلۋى نەمەسە وسى ارالىققا باس بوستاندىعىنان ايىرىلۋى مۇمكىن»، - دەيدى ءانۋار يبرايەۆ.
بۇعان دەيىن اسكەريلەردىڭ ومىرىنە قاۋىپ تونبەس ءۇشىن ءتيىستى شارالار قابىلداناتىنىن جازعان ەدىك.
اۆتور
اقەركە داۋرەنبەك قىزى
