سولتۇستىك كورەيانىڭ جاڭارتىلعان كونستيتۋسياسى كيم چەن ىننىڭ مارتەبەسىن كوتەردى
استانا. KAZINFORM - سولتۇستىك كورەيا بيلىگى وڭتۇستىك كورەيانى رەسمي تۇردە بولەك ەل رەتىندە مويىنداۋ جانە ونىڭ كوشباسشىسىنىڭ مارتەبەسىن كوتەرەتىن كونستيتۋسياعا تۇزەتۋلەر ەنگىزدى، دەپ حابارلايدى Yonhap.
جاڭارتىلعان سولتۇستىك كورەيا كونستيتۋسياسىنا ەل اۋماعىن قىتاي، رەسەي جانە وڭتۇستىك كورەيامەن شەكارالاس دەپ انىقتايتىن جاڭا تارماق قوسىلدى. سونداي-اق وندا سەۋلمەن قايتا بىرىگۋ تۋرالى كەز كەلگەن ەسكەرتۋ، سونىڭ ىشىندە «بەيبىت تۇردە قايتا بىرىگۋ» جانە «ۇلى ۇلتتىق بىرلىك» سياقتى تەرميندەر الىنىپ تاستالدى.
الايدا وندا ەكى كورەيا اراسىنداعى ۇزاق ۋاقىت بويى داۋلى بولىپ كەلگەن تەڭىز شەكارالارى، اسىرەسە ءىس جۇزىندەگى تەڭىز شەكاراسى سانالاتىن سولتۇستىك شەكارا سىزىعى بويىنشا ناقتى تارماق قاراستىرىلماعان. جاڭارتىلعان كونستيتۋسيا سونىمەن قاتار مەملەكەتتىك ىستەر كوميسسياسىنىڭ ءتوراعاسى كيم چەن ىننىڭ مارتەبەسىن كوتەرىپ، ونى سولتۇستىك كورەيانىڭ «مەملەكەت باسشىسى» ەتىپ تاعايىندادى. وعان ەلدىڭ يادرولىق كۇشتەرىنە قولباسشىلىق ەتۋ وكىلەتتىگىن بەردى جانە العاش رەت ونى مەملەكەتتىك ينستيتۋتتاردىڭ كونستيتۋتسيالىق يەرارحياسىندا جوعارعى حالىق اسسامبلەياسىنان (ج ح ا) جوعارى كوتەردى.
سولتۇستىك كورەيا العاش رەت 1948 -جىلدىڭ قىركۇيەگىندە كونستيتۋسيا قابىلداپ، 1972 -جىلى سوتسياليستىك كونستيتۋتسيانى قابىلداعانعا دەيىن وعان بەس رەت تۇزەتۋ ەنگىزدى. تاعى 12 رەت قايتا قارالعاننان كەيىن قۇجات وسى جىلدىڭ ناۋرىز ايىندا قايتادان قارالىپ، اتاۋىنان «سوتسياليستىك» ءسوزى الىنىپ تاستالدى.
بۇعان دەيىن ماگاتە باسشىسى سولتۇستىك كورەيا يادرولىق قارۋ الەۋەتىن ارتتىرعانىن مالىمدەگەن بولاتىن.
