سولتۇستىك پەن شىعىستان حالىق نەگە كوشىپ جاتىر

- سايلاۋ الدىنداعى كەزدەسۋلەر بارىسىندا سولتۇستىك قازاقستان، اقمولا، پاۆلودار، اباي، شىعىس قازاقستان وبلىستارى تۇرعىندارى «ادىلەت» پارتياسى وكىلدەرىنە وسى اۋماقتاردى گازداندىرۋ ماسەلەسىن كوتەرۋدى بىرنەشە رەت سۇرادى. سولتۇستىك جانە شىعىس وڭىرلەردى گازداندىرۋ، اتاپ وتكەنىمىزدەي ۇزاق مەرزىمدى ستراتەگيالىق جوسپارلاردا كوزدەلگەن. دەگەنمەن، 2026-جىلى پراكتيكالىق كونفيگۋراتسيا وزگەرە باستادى: سولتۇستىك باعىت بويىنشا پەتروپاۆل، كوكشەتاۋ جانە استانانى گازبەن جابدىقتاۋعا باعدارلانعان «ەسىل-استانا» ماگيسترالدىق گاز قۇبىرىنىڭ جەكە جوباسى جاسالىپ جاتىر، - دەدى دەپۋتات.

ونىڭ مالىمەتىنشە، قازاقستاننىڭ سولتۇستىك-شىعىس ەكونوميكالىق ماكرو-ايماعىندا جالپى 3,5 ميلليون ادام تۇرادى، ەلىمىزدىڭ اگرارلىق سالاسى ءونىمىنىڭ 46 پايىزىن، ونەركاسىپ ءونىمىنىڭ 21 پايىزىن وندىرەدى. سوعان قاراماستان 2025-جىلى كوشىپ كەلۋشىلەر مەن كوشىپ كەتۋشىلەر اراسىندا كەرى سالدو 27 مىڭ ادام بولدى.

- ونىڭ باستى سەبەپتەرىنىڭ ءبىرى - ايماقتاردىڭ گازبەن قامتىلماۋى، - دەدى ەرلان سايىر.

وسىعان وراي دەپۋتات حالىقتى گازبەن قامتۋ الەۋمەتتىك اسا ماڭىزدى ماسەلە ەكەنىن ەسكەرە وتىرىپ، كەلەسى قادامداردى ىسكە اسىرۋ قاجەت دەپ ەسەپتەيدى.

- مەملەكەت باسشىسىنىڭ تاپسىرماسىنا سايكەس، سولتۇستىك-شىعىس ەكونوميكالىق ايماعىن گازداندىرۋدى تەزدەتۋ؛

- قۇبىر تارتۋ ءۇشىن مەملەكەتتىك-جەكەشىلىك ارىپتەستىك، جەكە ينۆەستيتسيا كوزدەرىن تارتۋ؛

- ەلىمىزدە ىشكى گاز كوزدەرىن ىزدەستىرۋدى تەرەڭدەتۋ؛

- حالىق اراسىندا بۇل ماسەلەنىڭ شەشىلۋ تەتىكتەرى مەن مەرزىمدەرى جونىندە تۇسىندىرمە جۇمىستارىن جۇيەلى جۇرگىزۋ.

بۇعان دەيىن دەپۋتات ايسۇلۋ سۇلەيمەن پيلوتسىز اۆياتسيانى دامىتۋ ءۇشىن ءبىرىڭعاي سيفرلىق جۇيە قۇرۋدى ۇسىنعان ەدى.