سوڭعى قوڭىراۋ: ەلىمىزدە 3,8 ميلليون بالا وقۋ جىلىن اياقتايدى

استانا. KAZINFORM - بيىل 3,8 ميلليون وقۋشى كەزەكتى وقۋ جىلىن اياقتايدى. جىل قورىتىندىسى تۋرالى وقۋ-اعارتۋ ءمينيسترى عاني بەيسەمبايەۆ ۇكىمەت وتىرىسىندا باياندادى.

ونىڭ ايتۋىنشا، باستاۋىش سىنىپتى 374 مىڭ، نەگىزگى مەكتەپتى - 341 مىڭ بالا ءتامامدايدى جانە 186 مىڭ تۇلەك مەكتەپ قابىرعاسىنان تۇلەپ ۇشادى.

7704 جاس تۇلەك «التىن بەلگىگە» ۇمىتكەر.

«مەكتەپ تۇلەكتەرىنە ارنالعان «مەكتەبىم، ساعان مىڭ العىس!» اتتى سالتاناتتى ءىس- شارا 25-مامىردا وتەدى. اتتەستاتتاردى تابىستاۋ ءراسىمى 12-15-ماۋسىم ارالىعىنا بەلگىلەندى. 9 جانە 11-سىنىپ بىتىرۋشىلەرىنىڭ قورىتىندى ەمتيحاندارى 29-مامىر-11-ماۋسىم كۇندەرى وتەدى»، - دەدى ع. بەيسەمبايەۆ.

سونداي-اق، بيىل العاش رەت 5-8، 10-سىنىپتاردا قازاق ءتىلىن مەڭگەرۋدى باعالاۋ ماقساتىندا قازاق تىلىندە جانە باسقا تىلدە وقىتاتىن مەكتەپتەردىڭ ءبىلىم الۋشىلارى ءۇشىن ارالىق ەمتيحاندار وتكىزىلەدى.

اۆتور
ايجان سەرىكجان قىزى