سەناتتا ۇلتتىق سپورت تۇرلەرىن دامىتۋ ماسەلەسى تالقىلاندى

 استانا. KAZINFORM - سەناتتىڭ الەۋمەتتىك- مادەني دامۋ جانە عىلىم كوميتەتىنىڭ دەپۋتاتتارى تۋريزم جانە سپورت مينيسترلىگىنىڭ باسشىلىعىمەن كەزدەستى.

كەزدەسۋگە قاتىسۋشىلار ۇلتتىق سپورت تۇرلەرىن دامىتۋ مەن سالاداعى وزەكتى ماسەلەلەردى قارادى جانە ولاردى زاڭنامالىق دەڭگەيدە جەدەل شەشۋ جولدارىن تالقىلادى.

كوميتەت ءتوراعاسى نۇرتورە ءجۇسىپ سوڭعى جىلدارى ەلىمىزدە ۇلتتىق سپورتتىڭ تانىمالدىلىعىنىڭ تۇراقتى ءوسۋ ءۇردىسى بايقالىپ وتىرعانىن، سونىمەن بىرگە مەملەكەتتىڭ ۇلتتىق سپورت تۇرلەرىن قولداۋداعى ءرولى دە ايتارلىقتاي ارتىپ كەلە جاتقانىن اتاپ ءوتتى.

«ەلىمىزدە ۇلتتىق سپورتتى دامىتۋ -اسا ماڭىزدى ءارى وزەكتى ماسەلە. بەرىلگەن رەسمي مارتەبەسى مەن الەۋمەتتىك ماڭىزى جوعارى بولسا دا، ۇلتتىق سپورت ءالى كۇنگە دەيىن قوعام مەن جاس ۇرپاقتىڭ ءومىر سالتىنىڭ اجىراماس بولىگى بولا الماي كەلەدى. سونىمەن قاتار، بۇل سالادا ءوز شەشىمىن تالاپ ەتەتىن ەلەۋلى پروبلەمالار دا بار»، - دەپ اتاپ ءوتتى نۇرتورە ءجۇسىپ.

مادەنيەت جانە سپورت مينيسترلىگىنىڭ وكىلى كەزدەسۋ كەزىندە ەلىمىزدە 11 ۇلتتىق سپورت ءتۇرى رەسمي تىركەلگەنىن، ال ولارمەن جۇيەلى تۇردە اينالىساتىن سپورتشىلاردىڭ سانى سەكتسيالاردا دەنە شىنىقتىرۋمەن جانە سپورتپەن اينالىساتىنداردىڭ جالپى سانىنىڭ %8,7 ىن قۇرايتىنىن اتاپ ءوتتى. سونىمەن قاتار، ەلىمىزدە جىل سايىن سپورت تۇرلەرىنىڭ ۇلتتىق تىزىلىمىنە ەنگىزىلگەن حالىقارالىق دەڭگەيدەن اۋىلدىق دەڭگەيگە دەيىنگى مىڭنان استام جارىس وتكىزىلەدى. بيىل حالىقارالىق جارىستاردان ۇلتتىق قۇراما مۇشەلەرى 10 التىن، 13 كۇمىس، 20 قولا مەدال جەڭىپ الدى.

شاراعا سونىمەن قاتار ۇلتتىق سپورت تۇرلەرى قاۋىمداستىعىنىڭ، قالالىق جانە وبلىستىق ءماسليحاتتاردىڭ وكىلدەرى، سونداي-اق سالا ساراپشىلارى قاتىستى.