سەنات قازاقستان مەن وزبەكستاننىڭ ەكولوگيالىق باستامالارىنا ارنالعان قۇجاتتى ماقۇلدادى
استانا. KAZINFORM - بۇگىن سەناتتىڭ جالپى وتىرىسىندا «قازاقستان ۇكىمەتى مەن وزبەكستان ۇكىمەتى اراسىنداعى ەكولوگيا جانە قورشاعان ورتانى قورعاۋ سالاسىنداعى ىنتىماقتاستىق تۋرالى كەلىسىمدى راتيفيكاتسيالاۋ تۋرالى» زاڭى ماقۇلداندى.
بۇل كەلىسىمگە 2022-جىلعى 22-جەلتوقساندا تاشكەنتتە قول قويىلعان. كەلىسىم قورشاعان ورتانى قورعاۋ سالاسىنداعى ىنتىماقتاستىقتى دامىتۋعا جانە تيىسىنشە قازاقستان رەسپۋبليكاسى مەن وزبەكستان رەسپۋبليكاسى اراسىنداعى ەكولوگيا جانە قورشاعان ورتانى قورعاۋ سالاسىنداعى دوستىق قارىم-قاتىناستاردى نىعايتۋعا باعىتتالعان.
سەناتتىڭ اگرارلىق ماسەلەلەر، تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنىڭ مالىمەتىنشە، اتالعان قۇجات اياسىندا اتموسفەرالىق اۋانىڭ لاستانۋىنىڭ الدىن الۋ جانە ونى باقىلاۋ، سۋدىڭ لاستانۋىنا جول بەرمەۋ، بيولوگيالىق ارتۇرلىلىكتى ساقتاۋ، ەكوجۇيەنى توزۋدان قورعاۋ جانە قۇمدى داۋىلداردىڭ الدىن الۋ جانە باسقا دا ماسەلەلەر ەسكەرىلگەن.
بۇدان باسقا، كەلىسىمدە ارال باسسەينىندەگى ەكولوگيالىق جاعدايدى جاقسارتۋ جونىندەگى بىرلەسكەن ءىس-شارالاردى ازىرلەۋ قاراستىرىلعان. وسى حالىقارالىق قۇجات شەڭبەرىندە قورشاعان ورتانى مونيتورينگتەۋ سالاسىنداعى بىرلەسكەن عىلىمي-زەرتتەۋ قىزمەتى ماسەلەلەرى بويىنشا بىرلەسكەن كونفەرەنسيالار، دوڭگەلەك ۇستەلدەر، كەزدەسۋلەر، سونداي-اق جۇمىس توپتارىن وتكىزۋ جوسپارلانعان.
«اتالعان كەلىسىم قورشاعان ورتانى قورعاۋ سالاسىنداعى ىنتىماقتاستىقتى جانە ورمان القاپتارىن قالپىنا كەلتىرۋدى ۇيىمداستىرۋدى، سونداي-اق توپىراق پەن وسىمدىك جامىلعىسىنىڭ دەگراداتسياسىنا قارسى كۇرەستى قوسا العاندا، مونيتورينگىلەۋ بويىنشا ءوزارا ءىس-قيمىلدى جاقسارتۋعا مۇمكىندىك بەرەدى. قۇجات سۋ سىنامالارىن بىرلەسىپ ىرىكتەۋدى، سۋ ساپاسى بويىنشا دەرەكتەردى جانە نورماتيۆتىك قۇجاتتاردى تالداۋدى ءارى الماسۋدى جۇزەگە اسىرۋعا باعىتتالعان. ارال باسسەينىندەگى ەكولوگيالىق جاعدايدى جاقسارتۋ بويىنشا وزبەك تاراپىمەن بىرلەسكەن ءىس-شارالاردى جۇرگىزۋ ماڭىزدى ءىس-شارا دەپ ويلايمىن. وسىعان بايلانىستى بۇل كەلىسىمنىڭ قابىلدانۋى ەكى مەملەكەتتىڭ ارال تەڭىزى مەن ارال ءوڭىرىن قالپىنا كەلتىرۋدەگى، سونداي-اق وسى سالاداعى حالىقارالىق ءارى وڭىرلىك باعدارلامالاردى ازىرلەۋ مەن جۇزەگە اسىرۋداعى كۇش- جىگەرىن بىرىكتىرەدى جانە ۇيلەستىرەتىن بولادى. سەكسەۋىل ەگۋ ارقىلى ارال تەڭىزىنىڭ ەكولوگيالىق داعدارىسىنىڭ سالدارىن جەڭىلدەتۋ جانە قۇم-تۇزدى داۋىلداردىڭ الدىن الۋ بويىنشا قازاقستان مەن وزبەكستان تاراپتارىنىڭ ءىس-قيمىلدارىن ۇيلەستىرۋگە مۇمكىندىك بەرەدى»، - دەدى سەناتور جانبولات جورگەنبايەۆ.
