سارى اعاشتا كورشى بالانى قاساقانا ولتىرگەن جاس ءوسپىرىم قىلمىستىق جاۋاپكەرشىلىكتەن بوساتىلدى
تۇركىستان. KAZINFORM - تۇركىستان وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا اۋىر قىلمىس جاسادى دەپ ايىپتالعان جاس وسپىرىمگە قاتىستى ءىس قارالدى.
تەرگەۋ دەرەكتەرىنە سۇيەنسەك، ءبىرىنشى جاعداي 2024 -جىلدىڭ 16-مامىرىندا، تۇركىستان وبلىسى سارى اعاش اۋدانىنا قاراستى سىرگەلى اۋىلىندا بولعان. جاسءوسپىرىم اۋلاداعى اجەتحانا شۇڭقىرىنا 2021 -جىلى تۋعان كورشى بالانى كۇشتەپ يتەرىپ، قاساقانا ولتىرگەن.
ال، ەكىنشى جاعداي 2024 -جىلدىڭ 13-شىلدەسىندە تىركەلگەن. بۇل جولى ايىپتالۋشى 2019 -جىلى تۋعان تاعى ءبىر كورشى بالانى سول تاسىلمەن ومىرىنەن ايىرۋعا ارەكەتتەنگەن. الايدا، بۇل ارەكەتى جۇزەگە اسپاي قالعان.
سوت وتىرىسى بارىسىندا ۇسىنىلعان كەشەندى سوت-پسيحياتريالىق جانە پسيحولوگيالىق ساراپتاما قورىتىندىسىنا سايكەس، سوتتالۋشى «شيزوفرەنيا سيمپتومدارى قاباتتاسقان ءجىتى پوليمورفتى پسيحوزدىق بۇزىلۋ» دياگنوزىنا شالدىققانى انىقتالدى. سونىڭ سالدارىنان ول وقيعا بولعان ساتتە ءوزىنىڭ ارەكەتتەرىنە تولىق ەسەپ بەرە الماعان جانە ولاردىڭ ءمانىن دۇرىس تۇسىنە الماعان.
2025 -جىلى سوتپەن تاعايىندالعان قوسىمشا كەشەندى قايتالاما ساراپتاما دا وسى دياگنوزدى راستادى.
- قازاقستان رەسپۋبليكاسى قىلمىستىق كودەكسىنىڭ 16-بابىنا سايكەس، اقىل-ەسى دۇرىس ەمەس كۇيدە قوعامعا قاۋىپتى ءىس-ارەكەت جاساعان ادام قىلمىستىق جاۋاپتىلىقتان بوساتىلادى. وسىعان وراي، 2025 -جىلدىڭ 5 -ناۋرىزىندا سوت سوتتالۋشىنى قىلمىستىق جاۋاپكەرشىلىكتەن بوساتىپ، ونى ينتەنسيۆتى باقىلاۋمەن مامانداندىرىلعان ۇلگىدەگى پسيحياتريالىق ستاتسيوناردا مەديتسينالىق سيپاتتاعى ماجبۇرلەپ ەمدەۋگە جىبەرۋ تۋرالى شەشىم قابىلدادى. سونداي-اق، جابىرلەنۋشىلەردىڭ تالاپ ارىزدارى ءىشىنارا قاناعاتتاندىرىلىپ، زاڭدى وكىلىنەن 20 ميلليون تەڭگە وندىرىلەتىن بولدى. سوت قاۋلىسى زاڭدى كۇشىنە ەندى، دەلىنگەن تۇركىستان وبلىستىق سوتىنىڭ باسپا ءسوز قىزمەتى تاراتقان اقپاراتتا.
اۆتور
قايرات زاينيشيەۆ
