ساراپشى: ايگىلى ساۋندترەكتەردىڭ كونسەرتتەرى قازاقستاندى حالىقارالىق داۋعا دۋشار ەتۋى مۇمكىن

استانا. KAZINFORM - «ب. قالداياقوۆانىڭ ءشامشى الەمى» قورىنىڭ اتقارۋشى ديرەكتورى بوتاگوز قالداياقوۆا الەمگە ايگىلى ساۋندترەكتەردىڭ كونسەرتىن ۇيىمداستىرۋشىلار قازاقستاندى حالىقارالىق داۋعا دۋشار ەتۋ مۇمكىن ەكەنىن ايتادى.

«ءبىز قازىر حالىقارالىق داۋدىڭ الدىندا تۇرمىز. نەگە ەكەنىن ايتايىن با؟ ويتكەنى «عالامات عاسىر: سۇلەيمەن سۇلتان» سەريالىنىڭ ساۋندرەكتەرى دەگەن سياقتى كونسەرتتەر قاپتاپ كەتتى عوي. سونى وتكىزىپ جۇرگەندەردىڭ ەشقايسىسى الەم جۇلدىزدارىنا، ورىنداۋشىلارعا اۆتورلىق سىياقى تولەپ جاتقان جوق. ونىڭ ءبارى «پيراتتىق كونتەنت». شەتەلدىك اۆتورلار ءوز ەلىنەن بىزگە شاعىم تۇسىرسە، اسا ءىرى حالىقارالىق داۋ بولادى»، - دەيدى ساراپشى.

بوتاگوز قالداياقوۆا بۇل ماسەلەنى بيلەت وپەراتورلارى ارقىلى شەشۋگە بولاتىنىن ايتتى.

«مەن قازاقستاندىق اۆتورلاردى ايتىپ وتىرعان جوقپىن. «ءبىز جارايدى، ءوزىمىز عوي» دەپ قويا سالامىز. ونىڭ شەشىمى بار. Ticketon، «كاسسير» سياقتى بيلەت وپەراتورلارىن ساتىلعان بيلەت اينالىمىنان اۆتورلارعا سىياقى اۋدارۋعا مىندەتتەۋ كەرەك. زاڭ بويىنشا كونسەرت ۇيىمداستىرۋشىلار بيلەت ساتۋدان تۇسكەن اقشانىڭ 4 پايىزىن اۆتورلىق قوعامدارعا نەمەسە تىكەلەي مۇراگەرلەرگە اۆتورلىق سىياقى رەتىندە بەرۋگە مىندەتتى. ءان بولسا، 2 پايىزى ساز اۆتورىنا، 2 پايىزى ءماتىن اۆتورىنا بەرىلەدى. ول ءتارتىپتى ەشكىم ساقتاپ جاتقان جوق. ويتكەنى ەشكىم مۇنى تەكسەرە المايدى»، - دەدى ول.

اۆتور

ەسىمجان ناقتىباي