سالىنىپ جاتقان ۇيدەن پاتەر الماس بۇرىن وسى 5 نارسەنى مىندەتتى تۇردە تەكسەرىڭىز
استانا. KAZINFORM - قۇرىلىس كەزەڭىندە پاتەر ساتىپ الۋ قۇجاتتار مەن مامىلە تالاپتارىن مۇقيات تەكسەرۋدى قاجەت ەتەدى، دەپ حابارلايدى قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنىڭ باسپا ءسوز قىزمەتى.
- قازاقستاندا كوپپاتەرلى تۇرعىن ۇيلەردىڭ قۇرىلىسىن سالۋ ءۇشىن ازاماتتاردىڭ قاراجاتىن تارتۋ «تۇرعىن ءۇي قۇرىلىسىنا ۇلەستىك قاتىسۋ تۋرالى» قازاقستان رەسپۋبليكاسىنىڭ زاڭىمەن رەتتەلەدى. قاراجاتتى سالماس بۇرىن تاڭدالعان نىساننىڭ زاڭ تالاپتارىنا سايكەس ىسكە اسىرىلىپ جاتقانىنا كوز جەتكىزىڭىز، - دەيدى كوميتەت ماماندارى.
قاراجات تارتۋدىڭ زاڭدا كوزدەلگەن قانداي تاسىلدەرى بار؟
ازاماتتاردىڭ قاراجاتى مىنا نەگىزدەردىڭ ءبىرى بولعان جاعدايدا تارتىلۋى مۇمكىن:
- ءبىرىڭعاي وپەراتوردىڭ كەپىلدىگى بولعان كەزدە؛
- ەكىنشى دەڭگەيدەگى بانكتىڭ جوبانى ىسكە اسىرۋعا قاتىسۋى ارقىلى؛
- كوپپاتەرلى تۇرعىن ءۇيدىڭ قاڭقاسى تۇرعىزىلعاننان كەيىن ۇلەسكەرلەردىڭ قاراجاتىن تارتۋ ارقىلى.
ەگەر قۇرىلىس سالۋشىدا ازاماتتاردىڭ قاراجاتىن تارتۋعا زاڭدا كوزدەلگەن نەگىز بولماسا، سالىنىپ جاتقان ۇيدەگى پاتەر ءۇشىن تولەم جاساماۋ قاجەت.
ساتىپ الماس بۇرىن نەنى تەكسەرۋ كەرەك؟
1. قۇرىلىس سالۋشى مەن نىساندى
كومپانيا، تۇرعىن ءۇي كەشەنى جانە ونىڭ قۇرىلىسىنا قاتىستى قۇجاتتار تۋرالى اقپاراتتى زەردەلەڭىز.
2. قاراجات تارتۋ نەگىزىن
جوبانىڭ زاڭدا كوزدەلگەن تەتىكتەردىڭ ءبىرى ارقىلى ىسكە اسىرىلىپ جاتقانىنا كوز جەتكىزىڭىز.
3. شارتتى
پاتەردىڭ قۇنىنا، تولەم جاساۋ تارتىبىنە، قۇرىلىستى اياقتاۋ جانە تۇرعىن ءۇيدى تاپسىرۋ مەرزىمدەرىنە، سونداي-اق تاراپتاردىڭ قۇقىقتارى مەن مىندەتتەرىنە قاتىستى تالاپتارمەن مۇقيات تانىسىڭىز.
4. شارتتىڭ تىركەلۋىن
ۇلەسكەرلەردىڭ قاتىسۋى تۋرالى شارت بەلگىلەنگەن تارتىپپەن تىركەلۋگە ءتيىس.
شارتتىڭ نىسانىنا نازار اۋدارىڭىز
پاتەر ساتىپ الۋ كەزىندە الدىن الا شارتتار، برونداۋ شارتتارى، ينۆەستيتسيالىق كەلىسىمدەر جانە باسقا دا قۇجاتتار ۇسىنىلۋى مۇمكىن.
- شارتتىڭ اتاۋى مامىلەنىڭ زاڭدىلىعىن وزدىگىنەن ايقىندامايدى. ەگەر قۇجات ءىس جۇزىندە كوپپاتەرلى تۇرعىن ءۇي قۇرىلىسىنا ازاماتتاردىڭ قاراجاتىن زاڭدا بەلگىلەنگەن تەتىكتەردى اينالىپ ءوتىپ تارتۋ ءۇشىن پايدالانىلسا، مۇنداي سحەماعا جول بەرىلمەيدى، - دەيدى كوميتەتتەگىلەر.
اقپاراتتى قايدان تەكسەرۋگە بولادى؟
مامىلە جاساماس بۇرىن تۇرعىن ءۇي كەشەنى مەن قۇرىلىس سالۋشى تۋرالى مالىمەتتەردى رەسمي سيفرلىق سەرۆيستەر ارقىلى تەكسەرۋ ۇسىنىلادى.
تۇرعىن ءۇي نىساندارى تۋرالى اقپارات Homeportal.kz پورتالىندا قولجەتىمدى. سونداي-اق مالىمەتتەردى eGov ،Halyk ،Alatau، ب ت س ك جانە ەۋرازيالىق بانك سياقتى ءتيىستى مەملەكەتتىك جانە سيفرلىق سەرۆيستەر ارقىلى تەكسەرۋگە بولادى.
قاراجاتتى زاڭسىز تارتقانى ءۇشىن قانداي جاۋاپكەرشىلىك قاراستىرىلعان
زاڭناما تالاپتارىن بۇزعانى ءۇشىن اكىمشىلىك جاۋاپكەرشىلىك كوزدەلگەن:
- جەكە تۇلعالارعا - 200 ا ە ك؛
- شاعىن كاسىپكەرلىك سۋبەكتىلەرىنە - 500 ا ە ك؛
- ورتا كاسىپكەرلىك سۋبەكتىلەرىنە - 750 ا ە ك؛
- ءىرى كاسىپكەرلىك سۋبەكتىلەرىنە - 1000 ا ە ك؛
- ءىرى كاسىپكەرلىك سۋبەكتىلەرى تالاپتاردى قايتالاپ بۇزعان جاعدايدا - 2000 ا ە ك.
تولەم جاساماس بۇرىن - قىسقاشا چەك-پاراق
- قۇرىلىس سالۋشى مەن تۇرعىن ءۇي كەشەرى تەكسەرىلدى؛
- قاراجات تارتۋدىڭ زاڭدى نەگىزى انىقتالدى؛
- شارت مۇقيات زەردەلەندى؛
- ۇلەستىك قاتىسۋ تۋرالى شارت تىركەلگەن؛
- تولەم جاساۋ ءتارتىبى شارت تالاپتارىنا سايكەس كەلەدى.
- نەگىزگى قاعيدا: الدىمەن تەكسەرىڭىز - سودان كەيىن تولەم جاساڭىز. مامىلە جاسالعانعا دەيىن اقپارات پەن قۇجاتتاردى مۇقيات تەكسەرۋ سالىنىپ جاتقان تۇرعىن ءۇيدى ساتىپ الۋ كەزىندە تاۋەكەلدەردى ازايتۋعا مۇمكىندىك بەرەدى، - دەپ تۇيىندەدى ۆەدومستۆونىڭ باسپا ءسوز قىزمەتى.
بۇدان بۇرىن قوستانايدا ونداعان وتباسى باسپاناسىز قالعانىن جازعانبىز.
