سادىر جاپاروۆ قىرعىزستان ۇ ق ش ۇ- عا ءتوراعالىق ەتكەن كەزدە باسىمدىق بەرەتىن باعىتتاردى اتادى
استانا. KAZINFORM - قىرعىزستان 2025-جىلى كيبەرقاۋىپسىزدىك بويىنشا حالىقارالىق كونفەرەنسيا وتكىزەدى. بۇل تۋرالى ۇ ق ش ۇ ۇجىمدىق قاۋىپسىزدىك كەڭەسى كەزەكتى سەسسياسىنىڭ كەڭەيتىلگەن قۇرامداعى وتىرىسىندا قىرعىزستان پرەزيدەنتى سادىر جاپاروۆ ايتتى.
«كەلەسى جىلى قىرعىز رەسپۋبليكاسىنىڭ ۇ ق ش ۇ- عا ءتوراعالىق ەتۋى - ءبىز ءۇشىن ۇلكەن مارتەبە. وسى قۇرمەتتى ميسسيانى قابىلداۋعا دايىن ەكەنىمدى بىلدىرەمىن. قىرعىزستان ءتوراعا رەتىندە ۇيىمىمىزدىڭ ۇدەمەلى دامۋىن قامتاماسىز ەتۋ ءۇشىن بارلىق قاجەتتى كۇش-جىگەردى جۇمسايدى»، - دەدى قىرعىزستان پرەزيدەنتى.
سونىمەن قاتار ول 2025-جىلى قىرعىزستان قانداي باعىتتارعا نازار اۋداراتىندىعىن ايتتى.
اتاپ ايتقاندا، ساياسي قۇجاتتاردى قابىلداۋ تاجىريبەسىن ودان ارى قولداۋ جولىمەن سىرتقى ساياسي ءوزارا ءىس-قيمىلدى نىعايتادى. نورماتيۆتىك-قۇقىقتىق بازانى جەتىلدىرۋ ارقىلى ۇجىمدىق كۇشتەردىڭ دايىندىعىن ارتتىرۋ جولىمەن اسكەري قۇرىلىمداردى دامىتادى. تەرروريستىك جانە ەكسترەميستىك ماقساتتارعا اقپاراتتىق تەحنولوگيالاردى پايدالانۋدىڭ جولىن بىرلەسە كەسۋگە ءمان بەرەدى. اقپاراتتىق قاۋىپسىزدىك سالاسىنداعى ىنتىماقتاستىقتىڭ وزەكتىلىگى ارتىپ كەلە جاتقانىن ەسكەرە وتىرىپ، 2025-جىلى كيبەرقاۋىپسىزدىك بويىنشا حالىقارالىق كونفەرەنسيا وتكىزەدى.
سادىر جاپاروۆ ءسوز سوڭىندا قازاقستان تاراپىنان بيىل ۇ ق ش ۇ ءتوراعالىعىن تابىستى وتكىزۋىمەن قۇتتىقتادى.
«ۇجىمدىق قاۋىپسىزدىك كەڭەسىنىڭ كەزەكتى سەسسياسىن 2025-جىلدىڭ 4-توقسانىندا قىرعىز رەسپۋبليكاسىندا وتكىزۋدى ۇسىنامىن»، - دەدى ول.
