پرەزيدەنت قوعامدىق قاۋىپسىزدىكتى قامتاماسىز ەتۋدى كۇشەيتۋدى تاپسىردى

پرەزيدەنتكە ەلدەگى كريمينوگەندىك احۋال جانە قوعامدىق قاۋىپسىزدىك پەن قۇقىقتىق ءتارتىپتى قامتاماسىز ەتۋ جونىندەگى تاپسىرمالارىنىڭ ورىندالۋ بارىسى تۋرالى باياندالدى.

ەرجان سادەنوۆ بيىلعى توعىز ايدىڭ قورىتىندىسى بويىنشا قىلمىس دەڭگەيى 15 پايىزعا تومەندەگەنى جونىندە مالىمەت بەردى.

ناقتى ايتقاندا، وتكەن جىلمەن سالىستىرعاندا ازايعان قىلمىس سانى 11 مىڭنان اسادى. قىلمىستىڭ اسا اۋىر تۇرلەرى، سونداي-اق قوعامدىق ورىنداردا، كوشەلەردە، وتباسىلىق-تۇرمىستىق سالادا، كامەلەتكە تولماعاندار مەن بۇرىن سوتتالعاندار اراسىندا قۇقىق بۇزۋشىلىقتار كەمىگەن.

مينيستر وتكەن جىلدارى 2,5 مىڭنان استام قىلمىس اشىلعانىن ايتتى.

كريميناليستيكانىڭ زاماناۋي قۇرالدارى، سونىڭ ىشىندە د ن ق زەرتتەۋلەرى كوپ جىل بۇرىن جاسالعان قىلمىستارعا قاتىسى بار ادامداردى انىقتاۋعا مۇمكىندىك بەرىپ وتىر.

ول قوعامدا قۇقىقتىق ءتارتىپتى بۇزۋعا توزبەۋشىلىك داعدىسى ورنىعىپ كەلە جاتقانىن باياندادى.

جۇرتشىلىق پوليتسيانىڭ زاڭ مەن ءتارتىپتى جۇزەگە اسىرۋىنا بەلسەندى تۇردە كومەكتەسەدى. جىل باسىنان بەرى ازاماتتاردىڭ، ۆولونتەرلەر مەن قوعامدىق كومەكشىلەردىڭ اقپاراتى بويىنشا 12 مىڭنان اسا اكىمشىلىك قۇقىق بۇزۋشىلىقتىڭ جولى كەسىلىپ، 357 قىلمىس اشىلدى.

جازانىڭ بۇلتارتپاستىعىن قامتاماسىز ەتۋگە شەتەلدىك قۇقىق قورعاۋ ورگاندارىمەن ءوزارا ءىس-قيمىل ىقپال ەتىپ كەلەدى. ىزدەۋدە جۇرگەن 1039 ادام تابىلىپ، سىرت ەلدەردە بوي تاسالاپ جۇرگەن 154 ادام ۇستالدى. شەت مەملەكەتتەردىڭ سۇراۋى بويىنشا قازاقستان اۋماعىندا 537 قىلمىسكەر قۇرىقتالدى.

ىشكى ىستەر مينيسترلىگى تەرگەپ جاتقان قىلمىستىق ىستەر بويىنشا جىل باسىنان بەرى 49 ميلليارد تەڭگە قايتارىلعانى جونىندە ايتتى.

بۇل وتكەن جىلدىڭ وسى كەزەڭىمەن سالىستىرعاندا 22,5 پايىزعا كوپ.

ينتەرنەت-الاياقتىقتان زارداپ شەككەن ازاماتتارعا 6,5 ميلليارد تەڭگەدەن استام قاراجات قايتارىلعان. مۇنداي قىلمىستىڭ سانى 21 پايىزعا ازايدى. ولاردىڭ جولىن كەسۋ ماقساتىندا 8,7 مىڭ الاياقتىق جانە فيشينگتىك سايت، سونداي-اق 187 ميلليون الاياقتىق قوڭىراۋ بۇعاتتالدى.

ەرجان سادەنوۆ قوعامدىق قاۋىپسىزدىكتى قامتاماسىز ەتۋدىڭ سيفرلىق تەتىكتەرىن دامىتۋ جونىندە اقپارات بەردى.

بەينەباقىلاۋ جەلىسىنىڭ كومەگىمەن 2,2 مىڭنان استام ادام انىقتالىپ، ۇستالعان.

سيفرلىق شەشىمدەر جول قاۋىپسىزدىگىن قامتاماسىز ەتۋ ءۇشىن دە بەلسەندى قولدانىلىپ جاتىر.

بۇل شارالار پروفيلاكتيكالىق جۇمىستى كۇشەيتىپ، جول-كولىك وقيعالارىنىڭ سانىن 5 پايىزعا تومەندەتۋگە مۇمكىندىك بەردى. سونىمەن قاتار قازا تاپقاندار سانى 16 پايىزعا، جاراقات العاندار 7 پايىزعا ازايعان.

مەملەكەت باسشىسى ەلدەگى قۇقىقتىق ءتارتىپ پەن قوعامدىق قاۋىپسىزدىك دەڭگەيىن ودان ءارى ارتتىرۋعا باعىتتالعان ءبىرقاتار تاپسىرما بەردى.

ايتا كەتەلىك توقايەۆ ەمومالي راحمونمەن سويلەسىپ، قازاق-تاجىك بايلانىسىن كەڭەيتۋدىڭ ماڭىزىن ايتقان ەدى.