پرەزيدەنت جاڭا مينيسترگە اسكەري باسقارۋ جۇيەسىن جەتىلدىرۋدى تاپسىردى
استانا. KAZINFORM - مەملەكەت باسشىسى قورعانىس ءمينيسترى ايدوس مىرزاحمەتوۆتى قابىلدادى. بۇل تۋرالى اقوردا ءمالىم ەتتى.
كەزدەسۋدە پرەزيدەنت قاسىم-جومارت توقايەۆ ەلدىڭ قورعانىس قابىلەتىن نىعايتۋ، قارۋلى كۇشتەردىڭ جاۋىنگەرلىك دايىندىعىن كۇشەيتۋ جانە اسكەري باسقارۋ جۇيەسىن جەتىلدىرۋ بويىنشا ناقتى تاپسىرمالار بەردى.
مەملەكەت باسشىسى اسكەري قىزمەت قاۋىپسىزدىگىنە باسا نازار اۋداردى. پرەزيدەنت اسكەري قىزمەتشىلەردىڭ ءومىرى مەن دەنساۋلىعىن ساقتاۋ بارلىق دەڭگەيدەگى قولباسشىلىق ءۇشىن نەگىزگى باسىمدىق بولۋى كەرەك ەكەنىن اتاپ ءوتتى.
- پرەزيدەنت كاسىبي دايارلىقتىڭ ساپاسىن ارتتىرۋ، اسكەري ينفراقۇرىلىمدى دامىتۋ، قارۋ-جاراق پەن تەحنيكانى جاڭعىرتۋ، زاماناۋي تەحنولوگيالار مەن تسيفرلىق شەشىمدەردى ەنگىزۋ جونىندە مىندەتتەر جۇكتەدى،- دەلىنگەن حابارلامادا.
سونداي-اق مەملەكەت باسشىسى ساربازداردىڭ بويىندا جاۋاپكەرشىلىك، ءتارتىپ، وتانعا ادالدىق قاسيەتىن قالىپتاستىرۋعا باسا ءمان بەرە وتىرىپ، اسكەردەگى تاربيە جۇمىسىن كۇشەيتۋ قاجەتتىگىنە نازار اۋداردى.
بۇدان بولەك، اسكەري قىزمەتشىلەر مەن ولاردىڭ وتباسىن الەۋمەتتىك تۇرعىدان قولداۋ ماسەلەلەرىنە ايرىقشا ءمان بەرىلدى.
ايتا كەتەيىك، ايدوس مىرزاحمەتوۆ بۇگىن قورعانىس ءمينيسترى بولىپ تاعايىندالدى.
