پرەزيدەنتكە قاراعاندىدا گەولوگيالىق زەرتحانا سالۋ جوسپارى تانىستىرىلدى
استانا. KAZINFORM - پرەزيدەنت قاسىم-جومارت توقايەۆ Solidcore Resources plc كومپانياسىنىڭ باس اتقارۋشى ديرەكتورى ۆيتالي نەسيستى قابىلدادى، دەپ حابارلايدى اقوردانىڭ باسپا ءسوز قىزمەتى.
مەملەكەت باسشىسىنا باعالى جانە ءتۇستى مەتالداردى بارلاۋ، يگەرۋ جانە قايتا وڭدەۋمەن اينالىساتىن ءىرى كومپانيانىڭ قازاقستانداعى قىزمەتىنىڭ ناتيجەسى جونىندە مالىمەت بەرىلىپ، الداعى ۋاقىتقا ارنالعان جوسپارى تانىستىرىلدى.
پرەزيدەنتكە Solidcore Resources plc كومپانياسى پاۆلودار وبلىسىندا «ەرتىس گ م ك» جاڭا گيدرومەتاللۋرگيا كەشەنىنىڭ قۇرىلىسىن باستاعانى جونىندە باياندالدى. بولاشاق زاۋىت جىلىنا 300 مىڭ توننا كونتسەنترات شىعارا الادى. قۇرامىنداعى التىننىڭ ۇلەسى 98 پايىزعا جۋىقتايتىن دورە قۇيماسىن شىعارۋ جوسپارلانىپ وتىر.
سونداي-اق ۆيتالي نەسيس قاسىم-جومارت توقايەۆقا قاراعاندىدا گەولوگيالىق زەرتحانا سالۋ جوسپارىن تانىستىردى.
كەزدەسۋ سوڭىندا مەملەكەت باسشىسى كومپانيانىڭ وتاندىق ونەركاسىپكە قاجەتتى ينجەنەر ماماندار دايارلاۋ ماقساتىندا قابىلداعان شارالارىنىڭ ماڭىزى زور ەكەنىن اتاپ ءوتتى.
وسىعان دەيىن مەملەكەت باسشىسى Microsoft كومپانياسىنىڭ ورتالىق ەۋروپا مەن ورتالىق ازياداعى پرەزيدەنتى ميشەل سيممونستى قابىلداعانىن جازدىق.
