پرەزيدەنتكە اقمولا وبلىسىنىڭ 6 ايداعى دامۋى تۋرالى باياندالدى
استانا. KAZINFORM - مەملەكەت باسشىسى اقمولا وبلىسىنىڭ اكىمى مارات احمەتجانوۆتى قابىلدادى. پرەزيدەنتكە ءوڭىردىڭ بيىلعى ءبىرىنشى جارتىجىلدىقتاعى الەۋمەتتىك-ەكونوميكالىق دامۋىنىڭ قورىتىندىلارى تۋرالى ەسەپ بەرىلدى.
مارات احمەتجانوۆتىڭ ايتۋىنشا، وڭدەۋ ونەركاسىبىندە، اۋىل شارۋاشىلىعىنىڭ جالپى ءونىم كولەمىندە، كولىك قىزمەتى مەن بايلانىس سالاسىندا وڭ ديناميكا بايقالادى. سونىمەن قاتار وبلىس اكىمى ەكونوميكالىق ءوسىمدى قامتاماسىز ەتۋ ءۇشىن قولعا الىنعان شارالار تۋرالى ايتتى.
اگروونەركاسىپ سالاسىندا ءداندى داقىلداردان 5 ميلليون توننادان استام ءونىم الۋ كوزدەلىپ وتىر. مەملەكەتتىك قارجى ينستيتۋتتارىنىڭ قولداۋىمەن 7 ءىرى تاۋارلى ءسۇت فەرماسى سالىنۋدا. بيىل وڭدەۋ ونەركاسىبىندە 9 جوبانى ىسكە قوسۋ جوسپارلانعان. جالپى، وبلىس ەكونوميكاسىنا 179 ميلليارد تەڭگەدەن استام ينۆەستيتسيا تارتىلدى. ءوڭىردىڭ ينۆەستيتسيالىق پورتفەلىندە 187 جوبا بار. ولاردىڭ اياسىندا 1,7 مىڭ جۇمىس ورنى اشىلماق.
وبلىس ەكونوميكاسىن ودان ءارى ءارتاراپتاندىرۋ ماقساتىندا ارشالى اۋدانىندا رەسپۋبليكالىق ماڭىزى بار Aqmola يندۋستريالىق ايماعى قۇرىلدى. الەۋەتتى ينۆەستورلاردى تارتۋ جانە ولارعا «ءبىر تەرەزە» قاعيداسى بويىنشا قولداۋ كورسەتۋ ءۇشىن ەلوردادا Aqmola invest ينۆەستيتسيالاردى دامىتۋ ورتالىعى اشىلدى.
پرەزيدەنتكە سۋ تاسقىنىنىڭ سالدارىن جويۋ جانە زارداپ شەككەن ازاماتتاردى قولداۋ شارالارىنىڭ ورىندالۋ بارىسى جونىندە مالىمەت بەرىلدى. بۇگىندە 711 ءۇي تولىق جوندەۋدەن ءوتتى. 331 ءۇيدىڭ قۇرىلىسى ءجۇرىپ جاتىر، 221 تۇرعىن ءۇي ساتىپ الىنعان. 1782 وتباسىعا ءبىر رەتتىك كومەك بەرىلدى. 814 وتباسىنىڭ مۇلكىنە كەلگەن زالال وتەلدى. جاباي جانە قىلشاقتى وزەندەرىنىڭ ارنالارى تازارتىلىپ، اينالما كانالدار سالىنىپ جاتىر. سونىمەن قاتار جاعالاۋلاردى نىعايتۋ جۇمىستارى قولعا الىنعان.
قاسىم-جومارت توقايەۆقا جىلىتۋ ماۋسىمىنا دايىندىق، ينجەنەرلىك ينفراقۇرىلىمدى دامىتۋ جانە وبلىس ورتالىعىن اباتتاندىرۋ تۋرالى باياندالدى. كوكشەتاۋ قالاسىنىڭ تۇرعىن ءۇي قورىن جاڭعىرتۋ جانە جاڭارتۋ ءۇشىن 150 ەسكى ءۇيدى بۇزۋ، سونداي- اق 32 كوپپاتەرلى ءۇي سالۋ جوسپارلانعان.
بيىل 2 مىڭنان استام وتباسىنىڭ باسپانا جاعدايى جاقسارادى. كوكشەتاۋ، ستەپنوگورسك جانە اتباسار قالالارىندا جالپى ۇزىندىعى 26,4 شاقىرىم بولاتىن جىلۋ جەلىسى جوندەلىپ جاتىر. بۇل جەلىلەردىڭ توزۋ دەڭگەيىن ورتا ەسەپپەن 4,2 پايىز تومەندەتۋگە مۇمكىندىك بەرەدى. «جايلى مەكتەپ» ۇلتتىق جوباسى اياسىندا 9 مەكتەپتىڭ قۇرىلىسى اياقتالادى. ونىڭ تورتەۋى جاڭا وقۋ جىلى باستالعانعا دەيىن پايدالانۋعا بەرىلەدى. «اۋىلدا دەنساۋلىق ساقتاۋدى جاڭعىرتۋ» جوباسى بويىنشا 43 مىڭ تۇرعىنعا العاشقى مەديتسينالىق- سانيتارلىق كومەك كورسەتەتىن 38 نىساننىڭ قۇرىلىسى جۇرگىزىلىپ جاتىر.
كەزدەسۋ سوڭىندا پرەزيدەنت اقمولا وبلىسىنىڭ ستراتەگيالىق دامۋ جوسپارىن جۇزەگە اسىرۋ جۇمىستارىن جالعاستىرۋدى تاپسىردى. مەملەكەت باسشىسى ءوڭىردىڭ ەلىمىزدەگى ازىق- تۇلىك قاۋىپسىزدىگىن قامتاماسىز ەتۋدە نەگىزگى ءرول اتقاراتىنىنا نازار اۋدارىپ، اگروونەركاسىپ كەشەنىن جاڭعىرتۋ، سونىڭ ىشىندە ەگىن جيناۋ ناۋقانىن ۋاقتىلى ءارى ساپالى اتقارۋ ماڭىزدى ەكەنىن اتاپ ءوتتى.
