پرەزيدەنت زاڭعا قول قويدى: جەر، ورمان، كاسىپكەرلىك، بيۋدجەت، سۋ كودەكستەرىنە وزگەرىس ەنگىزىلەدى

استانا. KAZINFORM - مەملەكەت باسشىسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ازاماتتىق قورعاۋ، ەلەكتر ەنەرگەتيكاسى جانە مەملەكەتتىك مۇلىكتى باسقارۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭىنا قول قويدى. بۇل تۋرالى اقوردانىڭ باسپا ءسوز قىزمەتى حابارلادى.

زاڭ ارقىلى جەر، ورمان، كاسىپكەرلىك، بيۋدجەت، سۋ كودەكستەرىنە، سونداي-اق «ازاماتتىق قورعاۋ تۋرالى»، «قازاقستان رەسپۋبليكاسىنىڭ قورعانىسى جانە قارۋلى كۇشتەرى تۋرالى»، «قۇقىق قورعاۋ قىزمەتى تۋرالى»، «مەملەكەتتىك مۇلىك تۋرالى» زاڭدارى مەن باسقا دا نورماتيۆتىك-قۇقىقتىق اكتىلەرگە وزگەرىس ەنگىزىلەدى. تۇزەتۋلەردىڭ ءبىرىنشى بلوگى ءورت قاۋىپسىزدىگىن قامتاماسىز ەتۋ دەڭگەيىن ارتتىرۋعا باعىتتالعان.

ورمان ورتتەرىنە جەدەل دەن قويۋ ماقساتىندا مەملەكەتتىك ورگاندار مەن ۇيىمداردى ءورت سوندىرۋگە تارتۋ ءتارتىبى رەگلامەنتتەلدى. باسقارۋ جانە ءوزارا ءىس-قيمىل الگوريتمى ايقىندالدى.

ادامدار جاپپاي باراتىن وبەكتىلەر مەن بيىكتىگى 28 مەتردەن اساتىن عيماراتتار پايدالانۋعا قابىلدانار الدىندا مىندەتتى تۇردە ازاماتتىق قورعاۋ ورگاندارىنىڭ ءورت قاۋىپسىزدىگى تالاپتارىنا سايكەستىگى جونىندە قورىتىندى الۋعا مىندەتتەلەدى.

ءورت اۆتوماتيكاسى جۇيەلەرىن مونتاجداۋ، جۇرگىزۋ جانە تەحنيكالىق قىزمەت كورسەتۋ قىزمەتتەرىن جۇزەگە اسىرۋ ءۇشىن ەندى توتەنشە جاعدايلار مينيسترلىگىنىڭ رۇقساتى قاجەت. ادامدار كوپ باراتىن، اۋدانى 2 مىڭ شارشى مەتردەن اساتىن وبەكتىلەردىڭ يەلەرى ءۇشىنشى تۇلعالاردىڭ ومىرىنە، دەنساۋلىعىنا جانە مۇلكىنە زيان كەلتىرگەنى ءۇشىن ازاماتتىق-قۇقىقتىق جاۋاپكەرشىلىك جۇكتەيتىن ساقتاندىرۋدىڭ ۇلگىلىك شارتىن جاساۋعا مىندەتتەلەدى.

زاڭدا ءورتتىڭ الدىن الۋ جانە ءسوندىرۋ جونىندەگى ءىس-شارالارعا ءوز ەركىمەن قاتىساتىن ادامداردى الەۋمەتتىك قورعاۋ كەپىلدىكتەرى مەن شارالارى كوزدەلگەن. ياعني ولاردىڭ جۇمىس ورنى مەن ورتاشا جالاقىسى ساقتالادى. ەگەر ەڭبەك قاتىناسىندا بولماسا، ولارعا ەڭ تومەنگى جالاقى مولشەرىندە تولەم جاسالادى.

زاڭ جەرگىلىكتى اتقارۋشى ورگانداردى دالا ءورتىن، مەملەكەتتىك ورتكە قارسى قىزمەت بولىمشەلەرى جوق ەلدى مەكەندەردەگى ءورتتى جويۋ ءۇشىن تارتىلاتىن كۇشتەر مەن قۇرالداردى جانار-جاعارمايمەن جانە تاماقپەن قامتاماسىز ەتۋدى مىندەتتەيدى. تۇزەتۋلەردىڭ ەكىنشى بلوگى ونەركاسىپتىك قاۋىپسىزدىكتى جەتىلدىرۋگە باعىتتالعان.

ونەركاسىپتىك قاۋىپسىزدىككە تەكسەرۋلەر جۇرگىزۋدىڭ ەرەكشە ءتارتىبى مەن جەدەل ىقپال ەتۋ شارالارى قاراستىرىلعان. تاۋەكەل دارەجەسىنە قاراي باقىلاۋ جانە قاداعالاۋ سۋبەكتىلەرى (وبەكتىلەرى) تاۋەكەل دارەجەسى جوعارى جانە تاۋەكەلدىڭ جوعارى دارەجەسىنە جاتپايتىن سۋبەكتىلەر (وبەكتىلەر) بولىپ بولىنەدى.

تاۋەكەل دارەجەسى جوعارى سۋبەكتىلەر (وبەكتىلەر) جىل سايىن تەكسەرىلەدى، ال ول ساناتقا جاتپايتىن سۋبەكتىلەر كەمىندە 3 جىلدا ءبىر رەت تەكسەرىلەدى.

تەكسەرۋلەر جۇمىستان تىس ۋاقىتتا (تۇنگى ۋاقىتتا، دەمالىس، مەرەكە كۇندەرى) جۇرگىزىلۋى مۇمكىن.

تۇزەتۋلەردىڭ ءۇشىنشى بلوگى توتەنشە جاعدايدىڭ الدىن الۋ جانە جويۋ ماسەلەلەرىن جەتىلدىرۋگە باعىتتالعان.

توتەنشە جاعدايدىڭ الدىن الۋ جونىندەگى ءىس-شارالاردىڭ ورىندالۋىنا باقىلاۋدى كۇشەيتۋ ءۇشىن ت ج م-گە مەملەكەتتىك باقىلاۋ وكىلەتتىگى بەرىلەدى. ادامداردىڭ ءومىرى مەن دەنساۋلىعىن، ينفراقۇرىلىم وبەكتىلەرىن، عيماراتتار مەن قۇرىلىستاردى جەر سىلكىنىسىنەن قورعاۋ ماقساتىندا

زاڭدا:

- سەيسمولوگيالىق ستانتسيالار جەلىسىن جانە اۆتوماتتاندىرىلعان ەرتە حابارلاۋ جۇيەسىن كەڭەيتۋ جانە جاڭعىرتۋ؛

- ىرگەلى جانە قولدانبالى عىلىمي زەرتتەۋلەر، عىلىمي بولجامدار جۇرگىزۋ؛

 - سەيسميكالىق قاۋىپتى ايماقتاردا جەر سىلكىنىسىنە ءتوزىمدى قۇرىلىس جۇرگىزۋ جانە عيماراتتار مەن قۇرىلىستاردى سەيسميكالىق تۇرعىدان نىعايتۋ، سونداي-اق سەيسمولوگيالىق مونيتورينگ جۇرگىزۋ شارالارى كوزدەلگەن.

زاڭدا سونداي-اق ۇكىمەت جانىنداعى جۇمىس ورگانى بولىپ سانالاتىن جاپپاي نەمەسە وڭىرلىك اۋقىمداعى توتەنشە جاعدايدى جويۋ جونىندەگى رەسپۋبليكالىق جەدەل شتاب قىزمەتىنىڭ ءتارتىبى رەگلامەنتتەلگەن.

- جەرگىلىكتى نەمەسە وبەكتى اۋقىمىنداعى توتەنشە جاعداي كەزىندە اكىمدەرگە تابيعي جانە تەحنوگەندىك سيپاتتاعى توتەنشە جاعداي جاريالاۋ وكىلەتتىگى بەرىلدى. بۇل زياندى وتەۋ جانە تۇرعىن ءۇي وبەكتىلەرىنىڭ ينفراقۇرىلىمىن قالپىنا كەلتىرۋگە بايلانىستى ۋاقتىلى شەشىم قابىلداۋعا مۇمكىندىك بەرەدى. تۇزەتۋلەردىڭ ءتورتىنشى بلوگى ازاماتتىق قورعانىس جۇيەسىن جەتىلدىرۋگە باعىتتالعان.

ەندى ورتالىق جانە جەرگىلىكتى اتقارۋشى ورگانداردان بولەك، رەسپۋبليكا پرەزيدەنتىنە تىكەلەي باعىناتىن جانە ەسەپ بەرەتىن مەملەكەتتىك ورگاندار دا ازاماتتىق قورعانىس ءىس-شارالارىن جۇرگىزەدى.

جەرگىلىكتى اتقارۋشى ورگاندارعا ت ج م- ءنىڭ اۋماقتىق بولىمشەلەرىنە حالىقتى ازاماتتىق قورعانىسقا دايارلاۋ جانە وقىتۋ ورتالىقتارىن قۇرۋعا، سونداي-اق جاراقتاندىرۋعا جاردەم كورسەتۋ قۇقىعى بەرىلدى. بۇل وسى ماقساتتارعا جەرگىلىكتى بيۋدجەتتەن قاراجات بولۋگە مۇمكىندىك بەرەدى.

تۇزەتۋلەردىڭ بەسىنشى بلوگى قۇتقارۋشىلاردىڭ مارتەبەسىن كوتەرۋ، ولارعا تۇرعىن ءۇي تولەمدەرى مەن كوتەرمە جاردەماقى بەرۋ، ەڭبەكاقى مولشەرىن ارتتىرۋ، سونداي-اق اسكەري نەمەسە توتەنشە جاعداي كەزەڭىندە جۇمىس ىستەگەنى ءۇشىن ماتەريالدىق ىنتالاندىرۋ شارالارىن ازىرلەۋ تۋرالى مەملەكەت باسشىسىنىڭ تاپسىرماسىن ورىنداۋعا باعىتتالعان.

تۇزەتۋلەردىڭ التىنشى بلوگى مەملەكەتتىك مۇلىكتى باسقارۋ ماسەلەلەرىن جانە ەلەكتر ەنەرگەتيكاسى سالاسىن جەتىلدىرۋگە باعىتتالعان.

زاڭ ءماتىنى باسپا سوزدە جاريالانادى.