پرەزيدەنت ونەركاسىپ جانە قۇرىلىس ءمينيسترى قانات شارلاپايەۆتى قابىلدادى

استانا. KAZINFORM - قانات شارلاپايەۆ ونەركاسىپتىك دامۋ، گەولوگيا، جەر قويناۋىن پايدالانۋ جانە قۇرىلىس سالالارىنداعى جۇمىستىڭ ناتيجەسى مەن الداعى كەزەڭگە ارنالعان جوسپارى جونىندە باياندادى.

بيىلعى قاڭتار-اقپان ايلارىندا قازاقستاننىڭ وڭدەۋ ونەركاسىبىندەگى ءوسىم 7,4 پايىزدى قۇراعان.

ءوندىرىس كولەمىن ۇلعايتۋدا ماشينا جاساۋ، مەتاللۋرگيا، حيميا جانە جەڭىل ونەركاسىپ سياقتى سالالاردىڭ ۇلەسى زور.

جالپى قۇنى 1,5 تريلليون تەڭگە بولاتىن 180 جوبانى جۇزەگە اسىرۋ جوسپارلانعان. سونىڭ ارقاسىندا 17,8 مىڭ جۇمىس ورنى اشىلماق.

بىلتىر 157 مىڭ تۇرعىن ءۇي سالىنعان. بيىل 172 مىڭ تۇرعىن ءۇي سالۋ كوزدەلىپ وتىر.

سونداي-اق جالعا بەرىلەتىن 22 مىڭ تۇرعىن ءۇيدىڭ قۇرىلىسىنا مەملەكەتتەن 300 ميلليارد تەڭگەدەن استام قارجى بولىنگەن.

«وتباسى بانكى» ارقىلى قارجىلاندىرۋ كولەمى 300 ميلليارد تەڭگەنى قۇرايتىن باعدارلاما ىسكە قوسىلادى.

بۇل ەل ازاماتتارىنا 12 مىڭ يپوتەكالىق زايم بەرۋگە سەپتىگىن تيگىزەدى.

جەر قويناۋىن پايدالانۋ قۇقىعىن بەرۋگە قاتىستى اۋكسيونداردى ەلەكتروندى فورماتتا وتكىزۋ ءۇشىن E- Qazynakz سيفرلىق پلاتفورماسىنىڭ ىسكە قوسىلعان.

بۇل باستاما پروتسەستىڭ اشىقتىعى مەن قولجەتىمدىلىگىن ەداۋىر ارتتىردى.

قازىرگى ۋاقىتتا سۋ باسقان وڭىرلەردە جاڭا تۇرعىن ءۇي سالۋ ءۇشىن جوبالىق-سمەتالىق قۇجاتتامانىڭ قۇنىن بەكىتۋ جۇمىستارى اياقتالىپ كەلەدى.

قاسىم-جومارت توقايەۆ اپاتتان قيراعان تۇرعىن ۇيلەردى تەز ارادا قالپىنا كەلتىرۋدى تاپسىردى.