پرەزيدەنت تۇرعىن ءۇي-كوممۋنالدىق شارۋاشىلىق ماسەلەسىنە قاتىستى زاڭعا قول قويدى

استانا. KAZINFORM - مەملەكەت باسشىسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە تۇرعىن ءۇي-كوممۋنالدىق شارۋاشىلىق، كاسىپكەرلىك جانە ەكسپورتتىق-كرەديتتىك اگەنتتىكتىڭ قىزمەتى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭىنا قول قويدى.

بۇل تۋرالى اقوردانىڭ باسپا ءسوز قىزمەتى حابارلادى.

زاڭ جەر، كاسىپكەرلىك، ازاماتتىق پروتسەستىك، الەۋمەتتىك جانە سۋ كودەكستەرىنە، سونداي-اق 23 زاڭعا تۇزەتۋلەر ەنگىزدى.

تۇزەتۋلەردىڭ ءبىرىنشى بلوگى كوپپاتەرلى تۇرعىن ۇيلەردى باسقارۋ جۇيەسىن جەتىلدىرۋگە باعىتتالعان.

زاڭ كوپپاتەرلى تۇرعىن ۇيلەردى باسقارۋدىڭ جاي سەرىكتەستىك نىسانىن جويىپ، باسقارۋدىڭ ەكى ءتۇرىن عانا ساقتادى: م ي ب (مەنشىك يەلەرى بىرلەستىگى) جانە ت ب ب (تىكەلەي بىرلەسىپ باسقارۋ).

تۇزەتۋلەردىڭ ەكىنشى بلوگى سالىق زاڭناماسىنا ەنگىزىلگەن وزگەرىستەرگە بايلانىستى.

زاڭ، سونىمەن قاتار، دەكلاراتسيالاۋ ماسەلەلەرىندە قۇقىقتىق ايقىندىقتى ارتتىرۋعا جانە سالىق كودەكسىنىڭ ەرەجەلەرىنە سىلتەمە نورمالاردى وزەكتەندىرۋگە باعىتتالعان باسقا دا تۇزەتۋلەردى قامتىدى.

زاڭنىڭ ءماتىنى باسپا سوزدە جاريالانادى.