پرەزيدەنت تاپسىرماسى: كوكتەمگى ەگىس جۇمىستارى ەرتەرەك قارجىلاندىرادى
استانا. KAZINFORM - جاقىندا مەملەكەت باسشىسى اگروونەركاسىپ كەشەنىن نىعايتۋ باعىتىندا ناقتى مىندەتتەر جۇكتەگەن ەدى. بۇگىن ۇكىمەت وتىرىسىندا اۋىل شارۋاشىلىعى ۆيتسە- ءمينيسترى ازات سۇلتانوۆ اتقارىلعان شارالار تۋرالى باياندادى.
ونىڭ ايتۋىنشا، 2025 -جىلعى كوكتەمگى ەگىس جانە ەگىن جيناۋ جۇمىستارىن قارجىلاندىرۋ كولەمىن 100 ميلليارد تەڭگەگە جەتكىزۋ جوسپارلانۋدا.
«كورسەتىلگەن كولەمدەگى قاراجاتتى قامتاماسىز ەتۋ ماقساتىندا 2025 -جىلعا ارنالعان بيۋدجەت جوباسىندا 45 ميلليارد تەڭگە كوزدەلدى، قوسىمشا قاجەتتىلىك - 71,9 ميلليارد تەڭگەنى قۇرايدى. سونداي- اق، پرەزيدەنتتىڭ قارجىلاندىرۋدى بيىلعى جەلتوقسان ايىندا باستاۋ تاپسىرماسىن ورىنداۋ ءۇشىن ۇكىمەت قاۋلىسىنىڭ جوباسى ازىرلەندى. ول بۇگىنگى ۇكىمەت وتىرىسىنىڭ قاراۋىنا شىعارىلادى»، - دەدى ۆيتسە- مينيستر.
بۇل شەشىمدى كۇتپەي-اق، اگرارلىق نەسيە كورپوراتسياسى 29-قاراشادان باستاپ، 100 ميلليارد تەڭگە مولشەرىندە قارجىلاندىرۋدى باستايدى.
«قازىردىڭ وزىندە 500 دەن اسا اۋىل شارۋاشىلىعى تاۋارىن وندىرۋشىلەردەن ءوتىنىم كەلىپ ءتۇستى. قاراجات فەرمەرلەرگە ەكىنشى دەڭگەيلى بانكتەر، كرەديتتىك سەرىكتەستەر، الەۋمەتتىك كاسىپكەرلىك كورپوراتسيالار جانە اگرارلىق نەسيە كورپوراتسياسى ارقىلى قولجەتىمدى بولادى. بۇل جەردە بيىل باعدارلاماعا تەك 7 ا ك ك قاتىسقانىن ايتا كەتكەن ءجون. شارۋالاردىڭ وزدەرىنىڭ سۇراۋىمەن كەلەسى جىلى بارلىق وڭىرلەردەن الەۋمەتتىك- كاسىپكەرلىك كورپوراتسيالاردى تارتۋ كەرەك»، - دەدى ا. سۇلتانوۆ.
سالانى ۇزاقمەرزىمدى جانە قولجەتىمدى جەڭىلدەتىلگەن كرەديت بەرۋگە كوشىرە وتىرىپ، فەرمەرلەردى كرەديتتىك-سۋبسيديالاۋ جۇيەسى قايتا قارالادى.
«بۇل بيۋدجەت قاراجاتى بولماعان جاعدايدا تۋىندايتىن اگروبيزنەس تاۋەكەلدەرىن تومەندەتۋگە مۇمكىندىك بەرەدى. سونداي-اق، قارجىلاندىرۋ بولماعان كەزدە كرەديت بەرۋدى شەكتەۋ قايتا قارالادى، ول بيزنەستىڭ نارازىلىق كورسەتۋىنە جول بەرمەيدى. مىسالى، دامۋ قورى ارقىلى قارىزداردى سۋبسيديالاۋ تەتىگى جۇمىس ىستەيدى. كورسەتىلگەن شارالار جەكەشە بانكتەردەن اگروونەركاسىپتىك كەشەنگە كرەديت بەرۋگە دە تارتۋعا مۇمكىندىك بەرەدى»، - دەپ ءتۇسىندىردى سالا مامانى.
ءوز كەزەگىندە پرەمەر- مينيستر ولجاس بەكتەنوۆ جەڭىلدىكتى قارجىلاندىرۋ جانە ءونىمدى ءتيىمدى وتكىزۋ ەگىنشىلەر ءۇشىن اسا ماڭىزدى ماسەلە ەكەنىن ايتتى.
«ءبىز 2025 -جىلعى كوكتەمگى ەگىس جانە جيىن- تەرىن جۇمىستارىن ەرتەرەك قارجىلاندىرۋ قاجەت ەكەنىن ايتتىق. اۋىل شارۋاشىلىعى مينيسترلىگى مەن «بايتەرەك» حولدينگىنە تەز ارادا وتىنىمدەر پۋلىن جيناقتاپ، 1-جەلتوقساننان باستاپ قارجىلاندىرۋ جۇمىستارىنا كىرىسۋدى تاپسىرامىن. 10 اق كۇن قالدى تەزدەتىڭىزدەر»، - دەدى ۇكىمەت باسشىسى.
ال ازىق- تۇلىك كورپوراتسياسى فەرمەرلەردەن استىقتى قولايلى باعامەن تىكەلەي ساتىپ الۋدى قامتاماسىز ەتۋى كەرەك.
