پرەزيدەنت ەلدىڭ ءال-اۋقاتىن جاقسارتۋدى كوزدەيتىن ەكونوميكالىق وزگەرىستەرگە باسا نازار اۋداردى - قارين
استانا. KAZINFORM - مەملەكەت باسشىسى قاسىم-جومارت توقايەۆتىڭ بۇگىنگى باستامالارى ونىڭ بۇعان دەيىنگى جولداۋلارىنان جانە سايلاۋ الدىنداعى باعدارلاماسىنان باستاۋ العان رەفورمالاردى ودان ءارى دامىتۋعا ارنالدى.
بۇل پىكىردى بۇگىن ق ر مەملەكەتتىك كەڭەسشىسى ەرلان قارين ءبىلدىردى.
«مەملەكەت باسشىسى ءوز سوزىندە ازاماتتاردىڭ تۇرمىسىن جاقسارتۋدى كوزدەيتىن جۇيەلى ەكونوميكالىق وزگەرىستەرگە باسا نازار اۋداردى. پرەزيدەنت اتاپ وتكەن بارلىق توعىز باسىمدىق مەملەكەتتىك ساياساتتى ءدال وسى مىندەتتى ورىنداۋعا جۇمىلدىرادى. جولداۋدا جۇزگە جۋىق ءتۇرلى باستامالار، ۇستىنىستار جانە تاپسىرمالار بار. مىسالى، سالىق جۇيەسىن مۇقيات ويلاستىرا وتىرىپ قايتا جۇكتەۋ، شاعىن جانە ورتا بيزنەستى قولداۋعا ارنالعان شارالار توپتاماسىن وڭتايلاندىرۋ، اۋىل شارۋاشىلىعى ونەركاسىبى ءۇشىن قولجەتىمدى نەسيە بەرۋ، ءادىل ءارى ءتيىمدى تاريف ساياساتىن جۇرگىزۋ، كولىك ينفراقۇرىلىمىن جاڭعىرتۋ، بىلىكتى ماماندا دايارلاۋ، جاساندى ينتەللەكتىنى دامىتۋ جانە جاپپاي تسيفرلاندىرۋ، ازاماتتاردىڭ قاۋىپسىزدىگىن جان-جاقتى قامتامسىز ەتۋ سياقتى باسىمدىقتاردى ايرىقشا اتاپ وتەۋگە بولادى»، - دەپ جازدى مەملەكەتتىك كەڭەسشى ءوزىنىڭ Telegram ارناسىندا.
سونداي- اق ول پرەزيدەنت قوعامدا ءبىر جىل بويى تالقىلانىپ جاتقان اتوم ەلەكتر ستانساسىن سالۋ ماسەلەسىنە قاتىستى رەفەرەندۋمدى وتكىزۋ كۇنىن بەلگىلەگەنىن اتاپ ءوتتى. بۇل رەفەرەندۋم - «حالىق ۇنىنە قۇلاق اساتىن مەملەكەت» تۇجىرىمداماسىنىڭ جانە ادىلەتتى قازاقستان يدەياسىنىڭ جۇزەگە اسىرىلىپ جاتقانىنىڭ تاعى ءبىر ايقىن دالەلى.
مەملەكەت باسشىسى حالىقتى الاڭداتىپ وتىرعان ءبىرقاتار وزەكتى ماسەلەگە ارنايى توقتالدى. ونىڭ ىشىندە ينتەرنەت-الاياقتىق، جول اپاتتارى، اسكەردەگى ءتارتىپ، ناركوبيزنەسكە قارسى كۇرەس، مەديتسينالىق ساقتاندىرۋ جۇيەسىنىڭ كەمشىلىگى، پەداگوگيكالىق جانە مەديتسينالىق كادرلاردىڭ تاپشىلىعى، شاعىن جانە ورتا بيزنەس سالاسىن شەكتەن تىس مەملەكەتتىك باقىلاۋ، اۋىل شارۋاشىلىعى ستاتيستيكاسىن بۇرمالاۋ سياقتى تۇيتكىلدەرى بار.
جولداۋداعى كوپتەگەن الەۋمەتتىك-ەكونوميكالىق باستامالار مەملەكەت باسشىسى ۇلتتىق قۇرىلتايدىڭ وتىرىستارىندا ايتقان يدەولوگيالىق تۇجىرىمداردىڭ ءىس جۇزىندە جۇزەگە اسىرىلۋىنىڭ كورىنىسى بولعانىن اتاپ وتكەن ءجون.
«پرەزيدەنت جولداۋىن جاريالاۋعا ارنالعان جيىنعا دەپۋتاتتار، مينيسترلەر جانە اكىمدەر عانا ەمەس، ءتۇرلى سالادا قاجىرلى ەڭبەگىمەن دارالانعان جۇمىسشىلار، سونداي-اق ۇلتتىق قۇرىلتايدىڭ جانە ايماقتىق قوعامدىق كەڭەستەردىڭ مۇشەلەرى قاتىستى. بۇل تاجىريبە جاڭا ساياسي داستۇرگە اينالىپ كەلەدى. جالپى، جولداۋ كوپتەگەن كۇندەلىكتى مىندەتتەردى شەشۋ جانە ەلدى دامىتۋدىڭ ستراتەگيالىق ماقساتتارىنا جەتۋ جولدارىنا ارنالدى»، - دەپ قورىتتى ەرلان قارين.
