اۋىل مەكتەبىنە جىلدامدىعى جوعارى ينتەرنەت جەتكىزۋ - پرەزيدەنت ۇكىمەتكە شۇعىل مىندەت جۇكتەدى
«ەلىمىزدەگى بارلىق اۋىل مەكتەبىنە جىلدامدىعى جوعارى ينتەرنەتتى قولجەتىمدى ەتۋ ماسەلەسىن شەشۋ اسا ماڭىزدى».

رەسپۋبليكالىق پەداگوگتەر سەزىندە مەملەكەت باسشىسى قاسىم-جومارت توقايەۆ ۇكىمەتكە شۇعىل مىندەت جۇكتەدى، دەپ حابارلايدى قازاقپارات اقورداعا سىلتەمە جاساپ.
«التىنشى. ءبىلىم بەرۋ ۇدەرىسىن سيفرلاندىرۋ قارقىنىن جەدەلدەتۋ ماڭىزدى. شىن مانىندە، قازاقستاندا الەمنىڭ بەدەلدى وقۋ ورىندارىمەن باسەكەلەسە الاتىن مىقتى مەكتەپتەر بار. ءبىراق ونداي ءبىلىم وشاقتارىندا بالالارىمىزدىڭ جۇزدەن ءبىر بولىگى عانا وقيدى. ال سيفرلىق شەشىمدەر وزىق پەداگوگيكالىق تاجىريبەنى تەز ءارى ءتيىمدى تۇردە كەڭىنەن تاراتۋعا مۇمكىندىك بەرەدى. سول ارقىلى، ءتىپتى، شالعاي اۋداندارداعى وقۋشىلاردى ەلىمىزدىڭ جانە الەمنىڭ ۇزدىك ۇستازدارىنىڭ ماتەريالدارىمەن جانە ساباقتارىمەن قامتاماسىز ەتۋگە بولادى. سوندىقتان، ەلىمىزدەگى بارلىق اۋىل مەكتەبىنە جىلدامدىعى جوعارى ينتەرنەتتى قولجەتىمدى ەتۋ ماسەلەسىن شەشۋ اسا ماڭىزدى. بۇل - ۇكىمەتتىڭ الدىنداعى شۇعىل مىندەت»، - دەدى پرەزيدەنت.
مەملەكەت باسشىسىنىڭ تاپسىرماسى التى ايدا ورىندالۋى ءتيىس.
«اۋىل مەكتەپتەرىن جىلدامدىعى جوعارى ينتەرنەتپەن قامتاماسىز ەتۋ - سيفرلىق دامۋ مينيسترلىگىنە دە، وبلىس اكىمدەرىنە دە جۇكتەلەتىن جاۋاپكەرشىلىك. التى ايدان كەيىن بەرىلگەن تاپسىرمانىڭ ورىندالۋىن تەكسەرەمىن.
جالپى، ءبىلىم بەرۋ جۇيەسىن مۇلدە جاڭا دەڭگەيگە شىعارۋ ءۇشىن اۋقىمدى سيفرلىق ترانسفورماتسيالاۋ جۇمىستارىن جۇرگىزۋىمىز كەرەك. ەڭ الدىمەن، 2027 -جىلعا دەيىن ينتەرنەت جەلىسى ءالى تارتىلماعان مەكتەپتەردىڭ ءبارىن جىلدامدىعى جوعارى ينتەرنەتكە قوسۋ قاجەت. بۇل رەتتە ولاردىڭ ءارقايسىسىندا جەرگىلىكتى جەلى ورناتىلۋى كەرەك.
بۇل وزەكتى ماسەلەنى شەشۋگە «قولجەتىمدى ينتەرنەت» ۇلتتىق جوباسى سەپتىگىن تيگىزەدى. سونىمەن قاتار، بارلىق مەكتەپ وقۋشىسىنا ساپالى وقىتۋ كونتەنتى بار وزىق سيفرلىق پلاتفورمالاردىڭ، سونىڭ ىشىندە ەلەكتروندى وقۋلىقتاردىڭ قول جەتىمدىلىگىن قامتاماسىز ەتۋ قاجەت. بۇل رەتتە بارلىق ماتەريال سالالىق ساراپتامادان مۇقيات وتكىزىلۋى كەرەك»، - دەدى قاسىم-جومارت توقايەۆ.
وسى ورايدا، پرەزيدەنت مەتسەناتتاردى اۋىل مەكتەپتەرىنە دەمەۋشىلىك ەتۋگە شاقىردى.
«قايىرىمدىلىقپەن اينالىساتىن ازاماتتاردى، ەڭ الدىمەن اۋىل مەكتەپتەرىنە كومەكتەسۋگە شاقىرامىن. مۇعالىمدەردى نەگىزگى سيفرلىق قۇرالداردى قولدانا بىلۋگە ۇيرەتۋ ماڭىزدى. ءاربىر ۇستاز تەك ءوز ءپانىن جەتىك ءبىلىپ قانا قويماي، كەڭ مۇمكىندىكتەرگە جول اشاتىن زاماناۋي تەحنولوگيالاردى دا مەڭگەرۋگە ءتيىس.
وقۋ پروتسەسىندە سيفرلىق شەشىمدەردى قولدانۋ قالىپتى جاعدايعا اينالدى. قاشىقتان وقىتۋ جۇيەسىن بەلسەندى تۇردە ەنگىزۋ قاجەت. ءداستۇرلى جانە ونلاين فورماتتاردى ۇشتاستىرۋ بالالاردىڭ اقپاراتتى ءوز بەتىنشە ىزدەۋ داعدىسىن دامىتىپ، مەكتەپتەگى ورتاعا بەيىمدەلۋ مۇمكىندىكتەرىن ساقتاۋعا ىقپال ەتەدى.
قاشىقتان وقىتۋ كوپتەگەن ەلدە ءساتتى قولدانىلىپ كەلەدى. پاندەميا كەزىندە بىزدە دە وسىنداي تاجىريبە بولدى. ونلاين وقىتۋ جۇيەسىن ودان ءارى دامىتۋ ءۇشىن ءتيىستى قۇقىقتىق نەگىز قالاۋىمىز قاجەت»، - دەدى مەملەكەت باسشىسى.