پرەزيدەنت ۋكرايناداعى احۋالدىڭ ۋشىعۋىنا بايلانىستى شۇعىل شارالار قابىلداۋدى تاپسىردى
استانا. KAZINFORM - مەملەكەت باسشىسى ۋكرايناداعى احۋالدىڭ ۋشىعۋىنا بايلانىستى ەلىمىزدەگى ءتيىستى قۇرىلىمدارعا شۇعىل شارالار قابىلداۋدى تاپسىردى. بۇل تۋرالى ق ر پرەزيدەنتىنىڭ كەڭەسشىسى - پرەزيدەنتتىڭ باسپاءسوز حاتشىسى بەرىك ءۋالي مالىمدەدى.
«مەملەكەت باسشىسى قاسىم- جومارت توقايەۆ پرەمەر- مينيسترگە، پرەزيدەنت اكىمشىلىگىنىڭ باسشىسىنا جانە كۇشتىك قۇرىلىمداردىڭ جەتەكشىلەرى مەن بارلىق اكىمدەرگە ۋكراينا توڭىرەگىندەگى جاعدايدىڭ ۋشىعۋىنا بايلانىستى نەگىزگى اسكەري جانە ازاماتتىق نىسانداردىڭ قاۋىپسىزدىگىن قامتاماسىز ەتۋ جونىندە شۇعىل شارالار قابىلداۋدى تاپسىردى»، - دەپ جازدى بەرىك ءۋالي الەۋمەتتىك جەلىدەگى پاراقشاسىنا.
دەرەككە قاراعاندا، پارلامەنت پالاتالارىنىڭ ءتوراعالارى دا قابىلدانىپ جاتقان ءىس- قيمىل تۋرالى حاباردار ەتىلدى.
«پرەزيدەنت ەلىمىزدەگى جاعدايدى ءوز باقىلاۋىندا ۇستاپ وتىر.
ءبىزدىڭ ەلىمىز ءۇشىن باستى ستراتەگيالىق ماقسات - تۇراقتىلىقتى، تىنىشتىقتى، زاڭ مەن ءتارتىپ ۇستەمدىگىن ساقتاۋ.
قازاقستان سلاۆيان ەكى حالىق اراسىنداعى قاقتىعىستى كەلىسسوز ارقىلى توقتاتۋ قاجەت ەكەنىن بىرنەشە رەت مالىمدەگەن بولاتىن»، - دەپ تولىقتىرعان پرەزيدەنتتىڭ باسپاءسوز حاتشىسى.
