پرەزيدەنت «استانا» حالىقارالىق قارجى ورتالىعى سوت ءتوراعاسىنىڭ انت بەرۋ راسىمىنە قاتىستى
استانا. KAZINFORM - بۇگىن اقوردادا پرەزيدەنت قاسىم-جومارت توقايەۆتىڭ قاتىسۋىمەن ا ح ق و سوتىنىڭ جاڭادان تاعايىندالعان ءتوراعاسى لورد يان بەرنەتتىڭ رەسمي انت بەرۋ ءراسىمى ءوتتى.
جيىنعا ا ح ق و باسقارۋشىسى رەنات بەكتۇروۆ، ا ح ق و حالىقارالىق اربيتراج ورتالىعىنىڭ ءتوراعاسى توماس كريۋممەل، سونداي-اق ا ح ق و سوتىنىڭ تىركەۋشىسى جانە حالىقارالىق اربيتراج ورتالىعىنىڭ اپپارات جەتەكشىسى كريستوفەر كەمپبەلل-حولت قاتىستى.
رەسمي جيىندا ءسوز سويلەگەن مەملەكەت باسشىسى بۇل ينستيتۋتتىڭ كوممەرتسيالىق داۋلاردى شەشۋدە ەلەۋلى قىزمەت اتقاراتىنىن اتاپ ءوتتى.
- «استانا» حالىقارالىق قارجى ورتالىعى ينۆەستورلار سەنىم ارتاتىن ماڭىزدى الاڭ سانالادى. وسى ورايدا حالىقارالىق ستاندارتتارعا ساي تاۋەلسىز سوت جۇيەسى بار ا ح ق و سوتى نەگىزگى ءرول اتقارادى. قۇرمەتتى لورد بەرنەتت، ءسىزدى وسىناۋ جاۋاپتى لاۋازىمعا تاعايىندالۋىڭىزبەن قۇتتىقتايمىن. ءسىزدىڭ كانديداتۋراڭىزدىڭ تاڭدالۋى ا ح ق و سوت جۇيەسىنىڭ تۇراقتىلىق جانە سەنىمدىلىك قاعيداتتارىن ساقتاۋعا بەيىل ەكەنىن تاعى دا راستايدى، - دەدى قاسىم-جومارت توقايەۆ.
پرەزيدەنت ءوز مىندەتىن ىجداعاتتىلىقپەن ورىنداپ، ا ح ق و سوتىندا قارالعان ءار ىستە ادىلەتتىلىكتى جانە ءادىل سوت تورەلىگىن قامتاماسىز ەتۋگە كۇش سالعانى ءۇشىن سوتتىڭ بۇرىنعى ءتوراعاسى لورد دجوناتان مانسقا ريزاشىلىعىن ءبىلدىردى.
جيىننان كەيىن مەملەكەت باسشىسى شاراعا قاتىسۋشىلارمەن ا ح ق و سوتىن جانە حالىقارالىق اربيتراج ورتالىعىن ەلىمىزدىڭ ينۆەستيتسيالىق تارتىمدىلىعىن ارتتىرۋعا ىقپال ەتەتىن نەگىزگى تاۋەلسىز ينستيتۋتتار رەتىندە دامىتۋ پەرسپەكتيۆاسىن تالقىلادى. پرەزيدەنت داۋلاردى شەشۋگە قاتىستى حالىقارالىق قۇقىقتىڭ ۇزدىك تاجىريبەسىن ەنگىزۋ، سونداي-اق زاماناۋي تەحنولوگيانى، ونىڭ ىشىندە جاساندى ينتەللەكتىنىڭ الەۋەتىن بەلسەندى تۇردە پايدالانۋ ماڭىزدى ەكەنىن ايتتى.
اۆتور
ابىلايحان جۇماشەۆ
