پرەزيدەنت امەريكانىڭ بيزنەس وكىلدەرىمەن وتكەن «دوڭگەلەك ۇستەل» وتىرىسىندا ءسوز سويلەدى
نيۋ- يورك. KAZINFORM - قاسىم-جومارت توقايەۆتىڭ نيۋ-يوركتەگى جۇمىس ساپارى ا ق ش- تىڭ ءىرى بيزنەس وكىلدەرىنىڭ قاتىسۋىمەن وتكەن «دوڭگەلەك ۇستەل» وتىرىسىندا جالعاستى، دەپ حابارلايدى اقوردانىڭ باسپا ءسوز قىزمەتى.
مەملەكەت باسشىسى قازاقستان مەن ا ق ش- تىڭ كەڭەيتىلگەن ستراتەگيالىق سەرىكتەستىگى قارقىندى تۇردە دامىپ كەلە جاتقانىنا نازار اۋداردى.
- ءبىز امەريكانى ماڭىزدى سەرىكتەستەرىمىزدىڭ ءبىرى سانايمىز جانە سان قىرلى ىنتىماقتاستىقتى ودان ءارى دامىتۋعا مۇددەلى ەكەنىمىزدى راستايمىز. امەريكا قۇراما شتاتتارىنىڭ دا وسى ستراتەگيالىق ۇستانىمدى قولدايتىنى قۋانتادى. وعان پرەزيدەنت دونالد ترامپپەن 2024-جىلى جەلتوقسان ايىندا بولعان اڭگىمەلەسۋ بارىسىندا كوز جەتكىزدىك. بۇگىن ءبىز پرەزيدەنت ترامپپەن تاعى دا مازمۇندى اڭگىمە جۇرگىزدىك. ول ءۇشىن ريزاشىلىعىمدى بىلدىرەمىن. قازاقستان پرەزيدەنت ترامپتىڭ پراگماتيكالىق ديپلوماتيانى العا تارتۋىن، ەۋروپا مەن تاياۋ شىعىستان باستاپ ازيا مەن افريكاعا دەيىنگى قاقتىعىستاردى بەيبىت جولمەن رەتتەۋگە ىقپال ەتۋ ىسىندەگى رولىن جوعارى باعالايدى. ونىڭ كونسترۋكتيۆتى پوزيتسياسى مەن ناقتى ناتيجەگە قول جەتكىزۋگە ايرىقشا ءمان بەرۋى جاھانداعى جىكتەلۋ ۋشىققان كەزەڭدە شيەلەنىستىڭ باسەڭدەپ، ديالوگتىڭ ارتۋىنا ىقپال ەتۋدە. ماقسات-مىندەتى ايقىن مۇنداي باتىل ءارى تاباندى ارەكەت حالىقارالىق دەڭگەيدە مويىنداۋعا لايىق. ءبىزدىڭ ويىمىزشا، بۇل ۇستانىمدار ەرتەڭ وتەتىن ب ۇ ۇ- نىڭ جالپى دەباتىندا ۇيىمعا مۇشە مەملەكەتتەردىڭ نازارىنا ۇسىنىلۋى كەرەك. قۇراما شتاتتار قازاقستان ەكونوميكاسىنا 100 ميلليارد دوللاردان استام قارجى قۇيعان ءىرى ينۆەستور سانالادى. ەكى ەل ەكونوميكالىق ىقپالداستىقتا زور جەتىستىككە جەتتى. ءبىز مۇنى ماقتان تۇتامىز. قازىر ەلىمىزدە 630-دان استام امەريكالىق كومپانيا تابىستى جۇمىس ىستەپ جاتىر. ولاردىڭ قاتارىندا Chevron ،ExxonMobil ،Boeing ،Visa ،Mastercard ،Meta ،Wabtec ،Citibank سەكىلدى تانىمال برەندتەر بار، - دەدى پرەزيدەنت.
