پرەزيدەنت الماتى اۋەجايىنىڭ جاڭا حالىقارالىق تەرمينالىن ارالادى
الماتى. KAZINFORM - پرەزيدەنت قاسىم-جومارت توقايەۆتىڭ الماتىعا جۇمىس ساپارى قالا اۋەجايىنىڭ جاڭا حالىقارالىق تەرمينالىن ارالاپ كورۋدەن باستالدى.
مەملەكەت باسشىسىنا تەرمينالدىڭ اشىلۋى قارساڭىندا قۇرىلىستىڭ قالاي جۇرگىزىلگەنى جونىندە باياندالىپ، جولاۋشىلاردى تىركەۋ، شەكارا جانە كەدەندىك باقىلاۋ ايماقتارى، جۇك ءبولىمى تانىستىرىلدى.
«الماتى حالىقارالىق اۋەجايى» ا ق پرەزيدەنتى الپ ەر تۋنگا ەرسوي سەيسميكالىق جانە ءورت قاۋىپسىزدىگى تالاپتارىن ساقتاي وتىرىپ سالىنعان تەرمينال ماگنيتۋداسى 10 بالعا دەيىنگى جەر سىلكىنىسىنە توتەپ بەرە الاتىنىن ايتتى.
عيماراتتىڭ جالپى اۋدانى - 53,5 مىڭ شارشى مەتر، جىلىنا 14 ميلليون جولاۋشىعا قىزمەت كورسەتە الادى.
جاڭا تەرمينال ورتالىق ازيادا ءبىرىنشى بولىپ Excellence in Design for Greater Efficiencies (EDGE) باعدارلاماسى بويىنشا سەرتيفيكات الادى.
جولاۋشىلار مەن اۆياكومپانيالار سانىنىڭ ءوسۋىن ەسكەرە وتىرىپ، 50 تىركەۋ باعانى جۇمىس ىستەيتىن بولادى. ول ءۇشىن جاڭا جابدىقتار ساتىپ الىنعان. تەرمينالدا مۇمكىندىگى شەكتەۋلى ادامدار ءۇشىن تولىقتاي جاعداي جاسالعان.
بۇدان كەيىن پرەزيدەنت اۋەجايدىڭ جاڭا VIP-تەرمينالىن ارالاپ كوردى.
مەملەكەت باسشىسى قالا جانە ەل تۋرالى العاشقى اسەر اۋەجايدان قالىپتاساتىنىن اتاپ ءوتتى.
- الماتى حالىقارالىق اۋەجايى - ەلىمىزدەگى ەڭ ءىرى اۋە ايلاعى. وڭتۇستىك استانامىزدى تاماشالايتىن تۋريستەر سانى جىل سايىن ارتىپ كەلەدى. بىلتىر قالاعا 2 ميلليوننان استام تۋريست كەلىپ-كەتكەن. وسىدان ەكى جىل بۇرىن قۇرىلىس ورنىنا كاپسۋلا سالۋ راسىمىنە قاتىسىپ ەدىم. ال ەرتەڭ، مىنە، الماتى حالىقارالىق اۋەجايىنىڭ جاڭا تەرمينالى العاشقى رەيستەرگە قىزمەت كورسەتپەك، - دەدى قاسىم-جومارت توقايەۆ.
پرەزيدەنت تەرمينال قۇرىلىسىن حالىقارالىق ستاندارتتارعا ساي جۇرگىزگەنى ءۇشىن TAV GROUP كومپانياسىنا، سونداي-اق الماتى ءۇشىن وسىنداي ماڭىزدى جوباعا اتسالىسقان كرەديتورلار كونتسورتسيۋمى - ەۋروپالىق قايتا قۇرۋ جانە دامۋ بانكىنە، حالىقارالىق قارجى كورپوراتسياسىنا جانە ەۋرازيالىق دامۋ بانكىنە العىس ايتتى.
اۆتور
جانات قاپالبايەۆا
