پرەزيدەنت Alem.ai حالىقارالىق جاساندى ينتەللەكت ورتالىعىن ارالاپ كوردى

ورتالىقتا جاساندى ينتەللەكت سالاسىنداعى عىلىمي زەرتتەۋلەر مەن ءبىلىم بەرۋ باعدارلامالارى جۇرگىزىلىپ، ستارتاپ- باستامالار مەن باسقا دا قولدانبالى شەشىمدەردىڭ ەنگىزىلۋىنە جاعداي جاسالادى.

ىسكە اسىرىلىپ جاتقان جوبالار جي تەحنولوگياسىن مەملەكەتتىك سەكتوردا، بيزنەستە جانە كۇندەلىكتى ومىردە قولدانۋعا مۇمكىندىك بەرەدى.

جالپى، ورتالىق مەملەكەت باسشىسىنىڭ قازاقستاندى تەحنولوگيالىق، زاماناۋي جانە باسەكەگە قابىلەتتى ەلگە اينالدىرۋدى كوزدەيتىن ستراتەگيالىق باعدارىن ورىنداۋ ماقساتىندا قۇرىلعان.

پرەزيدەنت ورتالىقتى ارالاۋ بارىسىندا Astana Smart City جوباسىنىڭ ىسكە قوسىلعانىنا كۋا بولدى.

بۇل - ينتەللەكتۋالدى قالا ينفراقۇرىلىمىنىڭ جاڭا بۋىنىن قالىپتاستىراتىن ماڭىزدى باستاما.

Presight.AI كومپانياسىنىڭ باس ديرەكتورى توماس پراموتەدحام قالا جۇيەلەرى مەن دەرەكتەردى ناقتى ۋاقىت رەجيمىندە بىرىكتىرەتىن ءبىرىڭعاي AI پلاتفورمانى، سونداي-اق ونىڭ شاھاردى باسقارۋ تيىمدىلىگىن ارتتىرۋ بارىسىنداعى قولدانۋ مۇمكىندىكتەرىن تانىستىردى.

مەملەكەت باسشىسى كۇزدە ەلىمىزدە Astana AI Film Festival اتتى تاعى ءبىر ماڭىزدى حالىقارالىق بايقاۋ ۇيىمداستىرىلاتىنىن ايتتى.
- بۇل كرەاتيۆتى يندۋستريانىڭ دامۋىنداعى ىرگەلى وزگەرىستەردى كورسەتەتىن جاھاندىق دەڭگەيدەگى العاشقى ءىس-شارا بولماق. جاساندى ينتەللەكت شىعارماشىلىق تابيعاتىنا تۇبەگەيلى بەتبۇرىس اكەلەدى، ءوزىن تانىتۋدىڭ جاڭا فورمالارىن اشادى ءارى تالانتتاردىڭ الدىنان شىعاتىن كەدەرگىلەردى ازايتادى. قازاقستان وسى جاھاندىق جاڭاشىلدىقتاردىڭ بەل ورتاسىندا بولۋعا ۇمتىلادى. سونىمەن قاتار جاساندى ينتەللەكت اسەرىنەن كرەاتيۆتى يندۋستريا جويىلادى، قازىرگى كۇيىندە ساقتالمايدى دەگەن پەسسيميستىك بولجامداردى ەسكەرۋ كەرەك. سوندىقتان بارلىق ءۇردىستى باقىلاپ، وزگەرىستەرگە دەر كەزىندە بەيىمدەلۋ قاجەت. فەستيۆالدى ۇيىمداستىرۋ قازاقستاندى حالىقارالىق ارەناداعى يننوۆاتسيالار مەن جاسامپاز باستامالار ورتالىقتارىنىڭ ءبىرى رەتىندە كورسەتۋ ءۇشىن وتە ماڭىزدى، - دەدى پرەزيدەنت.
قاسىم-جومارت توقايەۆ تسيفرلاندىرۋ جانە جاساندى ينتەللەكتىنى جاپپاي ەنگىزۋ ۇدەرىسى اۋقىمدى وزگەرىستەرگە جول اشقانىن ايتتى.