پرەزيدەنت: ۋادەمىز بەن ءىسىمىز ءۇشىن جاۋاپ بەرە ءبىلۋىمىز كەرەك

استانا. KAZINFORM - مەملەكەتتىك ورگاندار ءوز جۇمىسىن جەتىلدىرۋ ءۇشىن ازاماتتاردىڭ وتىنىشتەرىن تالداۋعا كوبىرەك نازار اۋدارۋعا ءتيىس. بۇل تۋرالى قازاقستان حالقىنا جولداۋىن جاريالاۋ كەزىندە مەملەكەت باسشىسى قاسىم-جومارت توقايەۆ ايتتى.

«مەملەكەتتىك باسقارۋ ءىسىنىڭ تيىمدىلىگىن بارىنشا ارتتىرۋ كەرەك. مەن «حالىق ۇنىنە قۇلاق اساتىن مەملەكەت» تۇجىرىمداماسىن ۇسىنعالى بەس جىلدان استام ۋاقىت ءوتتى. وسى ۋاقىت ىشىندە قوعام مەن بيلىك قۇرىلىمدارى اراسىنداعى قارىم-قاتىناس مادەنيەتىن وزگەرتە الدىق. پىكىر ءبىلدىرۋدىڭ ءبىرقاتار ءتيىمدى تەتىگى جانە ءتۇرلى ديالوگ الاڭدارى پايدا بولدى. مەملەكەتتىك قىزمەتشىلەردىڭ ازاماتتارمەن تىكەلەي سويلەسۋى قالىپتى جاعدايعا اينالدى. بۇل تۇجىرىمداما مەملەكەتتىك قىزمەتشىلەر مىنەز- قۇلقىنىڭ جاڭا مودەلىن قالىپتاستىردى. ولار جاۋاپكەرشىلىكپەن، پرواكتيۆتى، اشىق جانە ءتيىمدى جۇمىس ىستەي باستادى. دەگەنمەن، مەملەكەت پەن قوعام اراسىنداعى ديالوگتىڭ ساپاسىن ودان ءارى ارتتىرا ءتۇسۋ ءۇشىن ءبارىمىز ادال ءارى ءادىل بولۋىمىز، تەك زاڭ اياسىندا ارەكەت ەتۋىمىز، بەرگەن ۋادەمىز بەن ءىسىمىز ءۇشىن جاۋاپ بەرە ءبىلۋىمىز كەرەك»، - دەدى قاسىم-جومارت توقايەۆ.

پرەزيدەنت مەملەكەتتىك ورگانداردىڭ جۇمىسىن جەتىلدىرۋگە قاتىستى تاپسىرما بەردى.

«ءبىز تالقىلانىپ جاتقان ماسەلەلەردىڭ ءمان- جايىن بىلە بەرمەيتىن، تىم اسىرا سىلتەۋگە بەيىم تۇراتىن پوپۋليستەردىڭ قوعامداعى كەيبىر باستامالاردى ءىلىپ الىپ، ءوز مۇددەسىنە بۇرىپ اكەتەتىنىن كورىپ ءجۇرمىز. مۇنىڭ دەموكراتياعا ەش قاتىسى جوق. وتىنىشتەردى قاراۋعا قاتىستى جۇمىستىڭ ءبىرىڭعاي ەكوجۇيەسى قالىپتاسا باستاعانى وتە ماڭىزدى. بۇل جۇيە حالىقتىڭ قاجەتتىلىگى مەن تالاپ-تىلەگىن ناقتى ءبىلىپ وتىرۋعا مۇمكىندىك بەرەدى. مەملەكەتتىك ورگاندار ءوز جۇمىسىن جەتىلدىرۋ ءۇشىن ازاماتتاردىڭ وتىنىشتەرىن تالداۋعا كوبىرەك نازار اۋدارۋعا ءتيىس»، - دەدى مەملەكەت باسشىسى.

اۆتور
رۋسلان عابباسوۆ