پريتون ۇستاۋ مەن جەڭگەتايلىق اۋىر قىلمىس ساناتىنا جاتقىزىلماق

استانا. KAZINFORM - پريتون ۇستاۋ مەن جەڭگەتايلىق اۋىر قىلمىس ساناتىنا جاتقىزىلماق. مۇنداي تۇزەتۋ ءماجىلىستىڭ جالپى وتىرىسىندا قارالىپ جاتقان «ادام ساۋداسىنا قارسى ءىس- قيمىل تۋرالى» زاڭ جوباسىنا ىلەسپە قۇجاتتا كوزدەلگەن.

ىشكى ىستەر ءمينيسترى ەرلان سادەنوۆتىڭ ايتۋىنشا، زاڭ جوباسىنا 2 ىلەسپە قۇجات بار. ونىڭ ءبىرىنشىسى - «ءبىرقاتار زاڭنامالىق اكتىلەرگە وزگەرىستەر مەن تولىقتىرۋلار ەنگىزۋ تۋرالى». وسى ىلەسپە زاڭ جوباسى اياسىندا قىلمىستىق كودەكسكە «ادام ساۋداسىمەن بايلانىستى قىلمىستار» ۇعىمى ەنگىزىلەدى. جاساۋ تاسىلدەرى بويىنشا «ادامدى قاناۋ» ۇعىمى كەڭەيتىلەدى.

«قىلمىستىق كودەكستىڭ 309-بابىنىڭ 2-بولىگى، ياعني «پريتون ۇستاۋ جانە جەڭگەتايلىقتى» «ينتەرنەت جەلىسى ارقىلى» جاساۋ دەگەن جاڭا سارالاۋ بەلگىسى كوزدەلدى. وسىلايشا، بۇل قىلمىس اۋىر ساناتقا جاتقىزىلادى»، - دەدى مينيستر.

مۇنان بولەك، ونىڭ سوزىنە قاراعاندا، قىلمىستىق- پروتسەستىك كودەكستە جابىرلەنۋشىنىڭ الەۋمەتتىك ارناۋلى قىزمەتتەر الۋعا قۇقىعى كوزدەلدى. بۇل رەتتە ولاردى وسى قۇقىقتارى تۋرالى حاباردار ەتۋ بويىنشا تەرگەۋشىلەرگە مىندەتتەر جۇكتەلدى.

«بۇدان باسقا، «نەكە جانە وتباسى تۋرالى» كودەكستە: لاۋازىمدى ادامدارعا بالالار قالدىرىلعان جاعدايدا، ولار بۇل تۋرالى پروكۋراتۋراعا حابارلاۋ مىندەتى بەكىتىلدى. اتاپ ايتقاندا، پريۋتتەر، بالالار ۇيلەرى جانە باسقا دا ۇيىمداردى قامتيدى. «جابىرلەنىشۋلەرگە وتەماقى قورى تۋرالى» زاڭعا قوسىمشا ءۇش قىلمىس ءتۇرى، ياعني قاناۋ ماقساتىندا ۇرلاۋ، باس بوستاندىعىنان زاڭسىز ايىرۋ، جانە جەزوكشەلىكپەن اينالىسۋعا تارتۋ قىلمىستارى بويىنشا قۇرباندارعا وتەماقى تولەۋ مۇمكىندىگى ەنگىزىلدى»، - دەدى ەرجان سادەنوۆ.

سونىمەن قاتار ول اكىمشىلىك قۇقىق بۇزۋشىلىق تۋرالى كودەكسكە وزگەرىستەر ەنگىزىلەتىندىگىن ايتتى.

«بۇل جەردە بالالاردى وزدەرىنە قالدىرعانى تۋرالى حابارلاماعانى ءۇشىن مەديتسينالىق ۇيىمداردىڭ، پريۋتتەردىڭ، بالالار ءۇيىنىڭ قىزمەتكەرلەرىنە قاتىستى جاۋاپكەرشىلىك كوزدەلىپ جاتىر»، - دەدى ول.

تالقىلاۋ بارىسىندا ءماجىلىس دەپۋتاتتارى نەگىزگى زاڭ جوباسى مەن وعان ىلەسپە 2 زاڭ جوباسىن ءبىرىنشى وقىلىمدا ماقۇلدادى.

اۆتور

مارلان جيەمباي