رەيستەر كەشىگىپ جاتىر: الماتى اۋەجايى جولاۋشىلارعا جۇگىندى

الماتى. قازاقپارات - الماتى حالىقارالىق اۋەجايى بارلىق قىزمەتتىڭ كۇشەيتىلگەن جۇمىس رەجيمىنە كوشكەنىن مالىمدەدى. رەيستەردىڭ كەشىگۋىن بارىنشا ازايتۋ ءۇشىن شارالار قابىلدانىپ جاتىر.

الماتى حالىقارالىق اۋەجايىنىڭ مالىمەتىنشە، مەتەورولوگيالىق جاعدايعا بايلانىستى كەيبىر ۇشىپ كەتۋ رەيستەرىنىڭ ۋاقىتى كەيىنگە شەگەرىلدى.

كەشىگۋلەردى ازايتۋ جانە جولاۋشىلارعا جايلى جاعداي جاساۋ ءۇشىن اۋەجاي مەن اۋە كومپانيالارى بىرلەسە جۇمىس ىستەپ، كۇتۋ زالدارىندا ىستىق تاماق، جەڭىل تاعامدار جانە سۋسىندار ۇيىمداستىردى.

- ۇشۋ قاۋىپسىزدىگىن قامتاماسىز ەتۋ ماقساتىندا ۇشاقتارعا مۇزعا قارسى وڭدەۋ جۇمىستارى قازاقستاننىڭ ۇلتتىق زاڭناماسىنىڭ تالاپتارىنا، سونداي-اق FAA (ا ق ش ازاماتتىق اۆياتسيا فەدەرالدى باسقارماسى) مەن كانادا كولىك مينيسترلىگىنىڭ ۇسىنىمدارىنا سايكەس جۇرگىزىلىپ جاتىر. بارلىق اۋەجاي قىزمەتى كۇشەيتىلگەن رەجيمدە جۇمىس ىستەپ جاتىر. اۋەجايدىڭ نەمەسە اۋە كومپانيالارىنىڭ رەسمي پاراقشالارىنان رەيستەردىڭ اعىمداعى ستاتۋسىن الدىن الا تەكسەرۋلەرىن ۇسىنامىز، - دەپ حابارلادى الماتى حالىقارالىق اۋەجايىنىڭ كورپوراتيۆتىك كوممۋنيكاتسيالار دەپارتامەنتىنەن.

وسىعان دەيىن اۋا رايىنا بايلانىستى الماتى حالىقارالىق اۋەجايىندا ءبىرقاتار رەيس كەشىگىپ جاتقانى تۋرالى جازعان ەدىك.

الما مۇقانوۆا

اۆتور