ەۋروپا ۋكرايناعا 35 ميلليارد ەۋرو كولەمىندە قولداۋ كورسەتەدى
استانا. قازاقپارات - جىل سوڭىنا دەيىن ەۋروپالىق وداق ۋكرايناعا 35 ميلليارد ەۋرو كولەمىندە قارجىلاي قولداۋ كورسەتۋدى جوسپارلاپ وتىر، دەپ حابارلايدى 24KZ.
بۇل جاردەم ەۋرووداقتىڭ «ۇلكەن جەتىلىك» ەلدەرىمەن بىرلەسىپ جۇزەگە اسىراتىن باستاماسى اياسىندا بەرىلمەك. قاراجات ەڭ الدىمەن ۋكراينانىڭ الەۋمەتتىك جانە گۋمانيتارلىق قاجەتتىلىكتەرىن وتەۋگە جۇمسالادى. ەۋروپالىق قايتا قۇرۋ جانە دامۋ بانكى ۋكراينا ەكونوميكاسىنىڭ 2025 -جىلعا ارنالعان ءوسىم بولجامىن %3,3- كە دەيىن تومەندەتتى.
بۇل شەشىم قارۋلى قاقتىعىس پەن جاھاندىق ساۋدا شيەلەنىسىنىڭ ۋشىعۋىنا تىكەلەي بايلانىستى. دەي تۇرعانمەن قارجى ۇيىمى ۋكراينا ەكونوميكاسىنا اۋقىمدى نەسيەلىك قولداۋدى توقتاتپايتىنىن رەسمي مالىمدەدى. جىل سوڭىنا دەيىن حالىقارالىق بانك ۋكرايناعا كەمىندە 1,5 ميلليارد ەۋرو ينۆەستيتسيا سالۋدى جوسپارلاپ وتىر. بۇل ينۆەستيتسيا نەگىزىنەن ەنەرگەتيكا، ينفراقۇرىلىم جانە جەكە سەكتوردى قولداۋعا باعىتتالعان. سونىمەن بىرگە ەۋروپالىق وداق تا بيىل «ۇلكەن جەتىلىك» ەلدەرىمەن بىرلەسىپ، ۋكرايناعا قوماقتى قاراجات بولەتىنىن رەسمي راستادى.
ۋرسۋلا فون دەر ليايەن، ەۋروپالىق كوميسسيا ءتوراعاسى:
- ءبىز ءۇشىن ۋكراينا تەك كورشى ەل ەمەس. ءبىز ءۇشىن ۋكراينا - ورتاق بولاشاعىمىزدىڭ ءبىر بولىگى. سوندىقتان ءبىز 2025 -جىلى Ukraine Facility باعدارلاماسى اياسىندا شامامەن 35 ميلليارد ەۋرو كولەمىندە قارجىلىق كومەك كورسەتۋگە دايىنبىز. ۋكراينا ءوز كەزەگىندە مەملەكەتتىك بيۋدجەتتىڭ باسىم بولىگىن، اتاپ ايتقاندا، جالپى ىشكى ءونىمنىڭ %26- ءىن قورعانىس پەن قاۋىپسىزدىك سالاسىنا قۇيىپ جاتىر.
ساۋىردەگى رەسمي مالىمەتتەرگە سايكەس ۋكرايناداعى جىلدىق ينفلياتسيا دەڭگەيى %15. الايدا ۇلتتىق بانك جىل سوڭىنا قاراي ينفلياتسيانىڭ بەسەڭدەپ، %8,7- تىك دەڭگەيگە دەيىن تومەندەۋىن بولجايدى. «ال قارۋلى قاقتىعىس جالعاسقان جاعدايدا جىل سوڭىنا دەيىن ەلدەگى ينفلياتسيا دەڭگەيى 7,5 شاماسىندا بولۋى مۇمكىن»، - دەيدى حالىقارالىق ۆاليۋتا قورى.
روبەرتا مەتسولا، ەۋروپارلامەنت ءتوراعاسى:
- ەۋروپا ۋكرايناعا كومەك كورسەتۋ ماقساتىندا ءبىرتۇتاس كۇشكە اينالدى. بۇرىن وداققا مۇشە مەملەكەتتەر اراسىندا ءوزارا بىرلىك بولمادى. ۋكراينانى قولداۋ ارقىلى ەۋروپا ەلدەرى وزدەرىنىڭ ساياسي ىنتىماقتاستىعى مەن ەرىك-جىگەرىن ايقىن كورسەتىپ وتىر.
وسىلايشا بيىل حالىقارالىق قارجى كولەمى رەكوردتىق دەڭگەيگە جەتەدى دەگەن بولجام بار. جالپى العاندا 2025 -جىلى ۋكرايناعا سىرتتان 58 ميلليارد دوللارعا دەيىن كومەك كەلۋى مۇمكىن. ونىڭ باسىم بولىگى - 40 ميلليارد دوللار «ۇلكەن جەتىلىك» ەلدەرىنىڭ باستاماسىمەن، رەسەيدىڭ بۇعاتتالعان اكتيۆتەرىنەن تۇسكەن كىرىس ەسەبىنەن بولىنەدى. قالعان قاراجات حالىقارالىق ۆاليۋتا قورى، ەۋروپالىق وداق جانە وزگە دە حالىقارالىق سەرىكتەستەر تاراپىنان بەرىلەدى. بۇل قارجى ۋكراينادا 40 ميلليارد دوللارعا باعالانعان بيۋدجەت تاپشىلىعىنىڭ ءبىر بولىگىن جابۋعا جەتەدى.
