ەرتىس ورمانىندا ورمان ءورتى جاڭا جۇيەنىڭ كومەگىمەن جىلدام انىقتالدى
پاۆلودار. KAZINFORM - ءورتتى ورمان اراسىندا ويناپ جۇرگەن بالالار ابايسىزدا تۇتاندىرىپ العان. ولاردىڭ اتا-انالارىنا 20 ايلىق ەسەپتىك كورسەتكىش مولشەرىندە ايىپپۇل سالىنىپ، ماتەريالدار سوتقا جىبەرىلدى.

«ەرتىس ورمانى» رەزەرۆاتىنداعى شالداي ورمانشىلىعى 124-ورامىندا ورمان كۇزەتىنىڭ ينسپەكتورلارى مەن شارباقتى اۋدانىنىڭ توتەنشە جاعدايلار باسقارماسى جانە پوليتسيا ءبولىمىنىڭ قىزمەتكەرلەرى ءورتتى ەرتە انىقتاۋ جۇيەسىنىڭ كومەگىمەن ورمان ءورتىن انىقتادى.
«بۇل جۇيە تابيعي رەزەرۆاتتاعى ورمان القابىنىڭ، سونداي اق ەلدى مەكەندەر اۋماعىنداعى جاعدايدى تاۋلىك بويى قاشىقتان باقىلاۋعا مۇمكىندىك بەرەدى. كامەلەتكە تولماعان بالالاردىڭ وتپەن ابايسىزدىعى ورتكە سەبەپ بولعانى بەلگىلى بولعان. ءورت سوندىرۋشىلەردىڭ جەدەل ارەكەتىنىڭ ارقاسىندا ءتىلسىز جاۋ تەز ءسوندىرىلدى. جالىن شارپىعان اۋماق - 0,01 گەكتار»، - دەپ حابارلادى «ەرتىس ورمانى» رەزەرۆاتىنان.

ەسكە سالا كەتەيىك، ەرتىس ورماندارىندا ءساۋىر ايىنان باستاپ ءورتتى ەرتە انىقتاۋ جۇيەسى ىسكە قوسىلدى. بۇل ماقساتقا بيۋدجەتتەن 2 ميلليارد تەڭگە بولىنگەن. ول ءۇشىن رەزەرۆات اۋماعىندا 23 بيىك مۇنارا تۇرعىزىلىپ، قاجەتتى جابدىقتار ورناتىلدى. ورمان ورتتەرىن ەرتە انىقتاۋ جۇيەسى - ورمان مونيتورينگىنە ارنالعان باعدارلامالىق- اپپاراتتىق كەشەن. ول شۇعىل تۇردە ءىس-شارالاردى قابىلداۋعا جانە ءورت قاۋىپتىلىگى جوعارى ماۋسىمىندا ورمان ورتتەرىنەن بولاتىن زالالدى ايتارلىقتاي ازايتۋعا مۇمكىندىك بەرەدى. ءورتتى انىقتاۋ تاۋلىك بويى 360 گرادۋسقا قارايتىن جانە 30 ك م- گە دەيىنگى راديۋستا جاعدايدى تىركەيتىن بەينەباقىلاۋ كامەرالارىنىڭ كومەگىمەن جۇزەگە اسىرىلادى. باقىلاۋ اۋماعى 10 مىڭ گەكتارعا دەيىن جەتەدى.

اۆتور
مۇرات اياعان