ەرتىس-بايان وڭىرىندە كيىكتەردىڭ سانى بەس ەسە كوبەيگەن

پاۆلودار. KAZINFORM - تابيعات قورعاۋ ينسپەكتورلارى پاۆلودار وبلىسىنىڭ اۋماعىندا 20 مىڭنان اسا اقبوكەن بارىن ايتادى. ولاردىڭ سانى سوڭعى ءتورت جىلدا بەس ەسە وسكەن.

ەلىمىزدە اقبوكەندەردىڭ بىرەگەي پوپۋلياتسياسىن ساقتاۋ ءۇشىن 1-جەلتوقساننان «اقبوكەن» اكسياسىنىڭ ەكىنشى كەزەڭى باستالادى. اكسيا ماقساتى - جانۋاردىڭ پوپۋلياتسياسىن ساقتاۋ، براكونەرلىكپەن كۇرەسۋ، سونداي-اق سيرەك كەزدەسەتىن جانۋارلاردى زاڭسىز اۋلاۋ جانە ولاردىڭ مۇيىزدەرى مەن باسقا دا ونىمدەرىن ساتۋدى توقتاتۋ.

- اكسيا بارىسىندا كيىكتەردىڭ سانىن جانە ولاردىڭ پوپۋلياتسياسىنىڭ جاي- كۇيىنە مونيتورينگ جۇرگىزىلەدى. اقبوكەندەر مەكەندەيتىن جانە كوشىپ- قوناتىن جەرلەرىن، اسىرەسە، كوبەيۋ كەزەڭىندە قورعاۋ شارالارى كۇشەيتىلەدى. ەرتىس-بايان وڭىرىندە اقبوكەندەردىڭ بەتپاقدالا پوپۋلياتسياسى مەكەندەيتىن اۋماقتارىنا ەرەكشە نازار اۋدارىلادى. ولاردىڭ نەگىزگى مەكەندەۋ ورىندارى - ماي جانە باياناۋىل اۋداندارى. بيىل وبلىستاعى اقبوكەندەردىڭ سانى 20 مىڭنان استى، بۇل 2020 -جىلمەن سالىستىرعاندا بەس ەسە كوپ. جىل باسىنان بەرى 12 رەيد وتكىزىلدى، زاڭبۇزۋشىلىقتار انىقتالعان جوق. 2019 -جىلدان باستاپ وبلىستا اقبوكەندەرگە قاتىستى براكونەرلىك فاكتىلەرى تىركەلمەگەن، - دەيدى پاۆلودار وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسىنىڭ باسشىسى رۋسلان تولەپبايەۆ.

كيىكتەردى اۋلاعانى (نەمەسە ولاردىڭ ءمۇيىزىن السا) ءۇشىن 6000-ايلىق ەسەپتىك كورسەتكىشكە دەيىنگى ايىپپۇل سالۋ نەمەسە 3 جىلدان 10 جىلعا دەيىن باس بوستاندىعىن شەكتەۋ، سونداي-اق مۇلىكتى تاركىلەۋ شاراسى قولدانىلادى.

اۆتور
مۇرات اياعان