رەسەيدەن قازاقستانعا 3-4 جولبارىس جەتكىزىلەدى
استانا. KAZINFORM - رەسەيدەن قازاقستانعا 3-4 جولبارىس جەتكىزىلەدى. بۇل تۋرالى ورتالىق كوممۋنيكاتسيالار قىزمەتىندەگى بريفينگتە ەكولوگيا جانە تابيعي رەسۋرستار مينيسترلىگى ورمان شارۋاشىلىعى جانە جانۋارلار دۇنيەسى كوميتەتىنىڭ ءتوراعاسى دانيار تۇرعامبايەۆ ايتتى.
- 2024 -جىلى تۇران جولبارىسى مەن پرجيەۆالسكي جىلقىسىن تاريحي مەكەنىندە قالپىنا كەلتىرۋ بويىنشا ەكى ۇلكەن جوبا جۇزەگە اسىرىلا باستادى. جولبارىستاردى تاريحي مەكەنىنە قايتا جەرسىندىرۋ جونىندەگى باعدارلامانى ىسكە اسىرۋ اياسىندا ىلە-بالقاش مەملەكەتتىك تابيعي رەزەرۆاتى قۇرىلدى. جولبارىستىڭ تابيعي ازىق قورىن قايتا قالپىنا كەلتىرۋ ءۇشىن رەزەرۆاتتىڭ اۋماعىنا 205 باس توعاي بۇعىسى اكەلىندى، 100-دەن استام قۇلاندى قونىس اۋدارۋ جۇمىستارى جۇرگىزىلدى، ەلىكتەر مەن قاباندار پوپۋلياتسياسى كوبەيتىلدى. وتكەن جىلى كۇزدە ىلە-بالقاش رەزەرۆاتىنا ارنايى تورلى قورشاۋدا ءوسىرۋ ءۇشىن نيدەرلاندىدان 2 جولبارىس اكەلىندى. رەسەي فەدەراتسياسىنان 3-4 جولبارىستى الىپ كەلۋ كۇتىلۋدە، - دەدى كوميتەت ءتوراعاسى.
ونىڭ اتاپ وتۋىنشە، پرجيەۆالسكيي جىلقىسىن قايتا جەرسىندىرۋ جۇمىستارى جالعاسىپ جاتىر.
«بۇرىن بۇل جىلقىلار ەلىمىزدىڭ 9 وبلىسىن مەكەن ەتكەن. پرجيەۆالسكي جىلقىسى الەمدىك جابايى تابيعاتتان 1960-جىلداردىڭ سوڭىنا قاراي جويىلىپ كەتكەن بولاتىن. مينيسترلىكتىڭ حالىقارالىق ۇيىمدارمەن ىنتىماقتاستىعىنىڭ ارقاسىندا قوستاناي وبلىسىنداعى «التىن دالا» رەزەرۆاتىنا پراگا حايۋاناتتار باعىنان 7 باس پرجيەۆالسكي جىلقىسى اكەلىندى. جالپى، 2029 -جىلعا دەيىن 40 باس جىلقى اكەلۋ جوسپارلانىپ وتىر، - دەدى ول.
ايتا كەتەيىك، ەلىمىزدە تۇران جولبارىستارىنىڭ العاشقى جونشىگى پايدا بولۋى مۇمكىن.
اۆتور
مارلان جيەمباي
