رەسەيدە ءبىرقاتار ءىرى سەرۆيسكە قاتىستى اۋقىمدى تەحنيكالىق اقاۋلار تىركەلدى

استانا. KAZINFORM - سوڭعى كۇندەرى رەسەيدە بىرنەشە ماڭىزدى قىزمەت پەن كومپانيانى قامتىعان اۋقىمدى تەحنيكالىق اقاۋلار تىركەلىپ وتىر، دەپ حابارلايدى Downdetector.

پايدالانۋشىلار «رەسەي پوشتاسىنىڭ» جۇمىسىنا بايلانىستى قيىندىقتارعا تاپ بولدى. نەگىزگى ماسەلە سايت پەن ونلاين سەرۆيستەردىڭ جۇمىسىنداعى اقاۋلارعا قاتىستى بولعان.

كەيىنىرەك فەدەرالدىق پوشتا وپەراتورى رەسمي تۇردە «پوشتا» رەسۋرستارىنىڭ قالىپتى رەجيمدە جۇمىس ىستەپ جاتقانىن مالىمدەپ، «ۇرەيگە بوي الدىرماۋعا» شاقىردى.

ماسەلەلەر تۋرالى «مەملەكەتتىك قىزمەتتەر» پورتالىنىڭ قولدانۋشىلارى دا حابارلادى. بۇل پلاتفورما ازاماتتارعا ەلەكتروندى تۇردە مەملەكەتتىك جانە جەرگىلىكتى قىزمەتتەرگە قول جەتكىزۋگە مۇمكىندىك بەرەدى.

شاعىمداردىڭ باسىم بولىگى ماسكەۋدە تىركەلگەن. اقاۋلاردىڭ جارتىسىنان كوبى پورتال سايتىنىڭ جۇمىسىمەن بايلانىستى بولعان.

بۇعان دەيىن «اەروفلوت» كومپانياسى دا جۇيەسىندە تەحنيكالىق اقاۋ بولعانىن حابارلاعان ەدى. سونىڭ سالدارىنان جۇزدەگەن رەيس كەيىنگە قالدىرىلعان نەمەسە توقتاتىلعان.

Silent Crow اتتى حاكەرلىك توپ «اەروفلوتقا» اۋقىمدى كيبەرشابۋىل جاساعانىن جاريالاپ، شامامەن 7000 فيزيكالىق جانە ۆيرتۋالدى سەرۆەردىڭ جويىلعانىن مالىمدەدى.

الايدا 30- شىلدە كۇنى «اەروفلوت» اۋە كومپانياسى ۇشۋ كەستەسى تولىق تۇراقتاندىرىلعانىن حابارلادى.

ايتا كەتەيىك، 28- شىلدە كۇنى تاڭەرتەڭگى «اەروفلوت» IT- جۇيەسىنە شابۋىل رەسەي ازاماتتىق اۆياتسياسى تاريحىنداعى ەڭ ءىرى كيبەرينتسيدەنتتەردىڭ ءبىرى رەتىندە باعالانۆپ وتىر.

وسىدان بۇرىن SU1962/1963 «ماسكەۋ - استانا - ماسكەۋ» رەيسى تەحنيكالىق سەبەپتەرگە بايلانىستى ورىندالماعانى حابارلاندى. بۇل ماسەلە ق ر كولىك مينيسترلىگىنىڭ ەرەكشە باقىلاۋىنا الىنعانى بەلگىلى بولدى.

كەشە TSARKA «اەروفلوت» جەلىسىنە باعىتتالعان كيبەرشابۋىلعا قاتىستى مالىمدەمە جاسادى.