رەسمي دەرەكتەر قىتاي پورتتارىنان شىعارىلعان جۇكتىڭ كولەمى ازايماعانىن كورسەتتى
استانا. KAZINFORM – ا ق ش- پەن ساۋدا سوعىسى قىتاي ەكونوميكاسىن كەرى كەتىرۋى مۇمكىن دەگەن بولجام جاسالعانىنا قاراماستان، ءساۋىر ايىنداعى رەسمي مالىمەتتەر ەلدەگى پورتتاردان شەت ەلدەرگە جونەلتىلگەن تاۋاردىڭ ناقتى كولەمى وزگەرىسسىز قالعانىن كورسەتىپ وتىر.
بۇل جايىندا Lianhe Zaobao باسىلىمى حابارلادى.
قىتايدىڭ كولىك مينيسترلىگى 6 -مامىردا جاريالاعان دەرەكتەرگە سايكەس، 27-ساۋىرگە دەيىنگى ءبىر اپتا ىشىندە ەلدەگى پورتتار 6,7 ميلليون كونتەينەر جونەلتكەن. بۇل كورسەتكىش بىلتىرعى سايكەس كەزەڭمەن سالىستىرعاندا 7 پايىزعا ارتىق.
سينگاپۋرلىق باسىلىمنىڭ جازۋىنشا، قىتايدىڭ سىرتقى ساۋدا تاسىمالىنىڭ باسىم بولىگى تەڭىز ارقىلى جۇزەگە اسىرىلادى، دەمەك، بۇل كورسەتكىشتەر الدا جاريالاناتىن ءساۋىر ايىنىڭ ەكسپورتتىق دەرەكتەرى دە تۇراقتى بولاتىنىن مەڭزەيدى.
ءساۋىر ايىندا قىتايدىڭ اۋە تاسىمالى دا ايتارلىقتاي تۇراقتىلىق بايقاتقان. رەسمي دەرەككە سايكەس، 27 -ساۋىرگە دەيىنگى ءتورت اپتا ىشىندە حالىقارالىق جۇك رەيستەرىنىڭ سانى وتكەن جىلدىڭ سايكەس كەزەڭىمەن سالىستىرعاندا %30- عا وسكەن. بۇل ءوسىم Shein جانە Temu سياقتى ەلەكتروندىق ساۋدا پلاتفورمالارىنىڭ ساتۋ كولەمىنىڭ كۇرت ارتۋىمەن بايلانىستى بولۋى مۇمكىن. اتالعان پلاتفورمالار شاعىن سالەمدەمەلەرگە ارنالعان سالىقتىق جەڭىلدىك اياقتالعان 2-مامىرعا دەيىن ءوز تاۋارلارىن سىرتقا بەلسەندى تۇردە جونەلتكەن ەدى.
Bloomberg ساراپشىلارىنىڭ پىكىرىنە سۇيەنگەن باسىلىم ءساۋىر ايىندا قىتاي ەكسپورتىنىڭ كولەمى بىلتىرعى سايكەس مەزگىلمەن سالىستىرعاندا %2,5- عا وسكەن دەپ بولجايدى. بۇل ناۋرىز ايىنداعى 12 پايىزدىق وسىمنەن الدەقايدا باسەڭ بولعانىمەن، ا ق ش كەدەندىك سالىقتى كۇرت مولايتقان كۇردەلى كەزەڭدە كوڭىل كونشىتپەيتىن ناتيجە ەمەس.
الايدا، ەكى ەل اراسىنداعى ناقتى ساۋدا اينالىمىنىڭ ازايىپ كەلە جاتقانى انىق بىلىنەدى. باسىلىمنىڭ جازۋىنشا، سوڭعى دەرەكتەرگە سايكەس، قىتاي پورتتارىنا ايالداپ، سوسىن ا ق ش- قا قاراي جول تارتقان جۇك كەمەلەرىنىڭ سانى ءساۋىر ايىنىڭ ورتاسىنداعى 73-تەن سوڭعى كۇندەرى 47-گە دەيىن ازايعان.
باسىلىم سونداي-اق تەڭىز جانە اۋە تاسىمالى جونىندەگى رەسمي دەرەكتەردىڭ مەجەلى ۋاقىتتان شامامەن ءبىر اپتاداي كەش جاريالانعانىنا دا نازار اۋدارىپتى.
ەسكە سالساق، ا ق ش قىتايدان قۇنى 800 دوللاردان از شاعىن سالەمدەمەلەردىڭ باج سالىعىنسىز اكەلىنۋىن توقتاتقان بولاتىن.
اۆتور
ەرلان مازان
