پرەمەر كامەرالاردى كولىك جۇرگىزۋ كەزىندە تەلەفونعا تەلمىرگەن جۇرگىزۋشىلەردى انىقتاۋعا باعىتتاۋدى تاپسىردى
استانا. KAZINFORM - جولدارداعى اۆتوماتتاندىرىلعان جۇيەلەر كولىك جۇرگىزۋ كەزىندە تەلەفون پايدالانۋ فاكتىلەرىن بارىنشا انىقتاۋعا باعىتتالۋعا ءتيىس. بۇل تۋرالى ۇكىمەت وتىرىسىندا پرەمەر-مينيستر ولجاس بەكتەنوۆ ايتتى.
- جول-كولىك وقيعالارىنىڭ نەگىزگى بولىگى ەلدى مەكەندەردە ورىن الادى. ايتا كەتۋ كەرەك، كەيبىر جول اپاتتارىنا كولىك جۇرگىزۋشىلەرىنىڭ ۇيالى تەلەفونداردى پايدالانۋى سەبەپ بولادى. جولدارداعى اۆتوماتتاندىرىلعان جۇيەلەر كولىك جۇرگىزۋ كەزىندە تەلەفون پايدالانۋ فاكتىلەرىن بارىنشا انىقتاۋعا باعىتتالۋعا ءتيىس. جالپى، ىشكى ىستەر مينيسترلىگى اكىمدىكتەرمەن بىرلەسىپ، ورناتىلعان بارلىق كامەرانىڭ جۇمىسىن تەكسەرىپ شىققانى ءجون، - دەدى ولجاس بەكتەنوۆ.
سونداي-اق پرەمەر-مينيستر جاياۋ جۇرگىنشىلەرمەن بولاتىن وقيعالارعا بولەك توقتالدى.
- كوپ جاعدايدا وعان جاياۋ جۇرگىنشىلەردىڭ وزدەرى كىنالى بولىپ جاتادى. سوندىقتان جولدى بەلگىلەنبەگەن جەردەن كەسىپ وتەتىن ادامدارعا قاتىستى جاۋاپكەرشىلىكتى قاتاڭداتۋ قاجەت. رەتتەلمەيتىن جاياۋ جۇرگىنشىلەر وتەتىن جەرلەردە كولىك جۇرگىزۋشىلەرىنىڭ كىناسىنەن بولاتىن جول اپاتتارى دا از ەمەس. اكىمدىكتەرگە وسىنداي ۋچاسكەلەردە بەينەتىركەۋ جۇيەلەرىن ورناتۋ اۋقىمىن كەڭەيتۋدى تاپسىرامىن. اسىرەسە ءبىلىم بەرۋ ۇيىمدارىنىڭ ماڭىندا كەرى ساناۋ تابلوسى بار زاماناۋي باعدارشامداردى ورناتۋدى قامتاماسىز ەتۋ قاجەت. ىشكى ىستەر مينيسترلىگى كوشەلەردىڭ قاۋىپسىز ديزاينى ەلەمەنتتەرىن ەنگىزۋ بويىنشا حالىقارالىق تاجىريبەنى زەردەلەۋگە ءتيىس،- دەدى پرەمەر-مينيستر.
بۇعان دەيىن جول ەرەجەسىن ورەسكەل بۇزاتىندار جۇرگىزۋشى كۋالىگىنەن 1 جىلعا ايىرىلۋى مۇمكىن ەكەنىن جازعان ەدىك.
