ەرلىك جاساعانداي ايتىپ وتىرسىز. قوشانوۆ ءمينيستردى سىناپ تاستادى

ءماجىلىس وتىرىسىندا ءتوراعا ەرلان قوشانوۆ پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى نۇرلان بايبازاروۆتى سىناپ تاستادى، - دەپ حابارلايدى Massaget.kz.

«وزدەرىڭىز قوجا، وزدەرىڭىز ءبي». دەپۋتات سايىروۆتىڭ سۇراعى
دەپۋتات ەرلان سايىروۆ پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى نۇرلان بايبازاروۆقا بيۋدجەتكە ەنگىزىلگەن تۇزەتۋلەر مەن قىسقارعان شىعىن كولەمىنە قاتىستى سۇراق قويدى.

«بيىل ۇكىمەت پارلامەنتتىڭ قاتىسۋىنسىز بيۋدجەتكە توعىز تۇزەتۋ ەنگىزدى. پارلامەنتتىڭ قاتىسۋىنسىز بيۋدجەتكە تۇزەتۋ ەنگىزۋ پرەزيدەنت توقايەۆتىڭ قوعامدىق باقىلاۋ كونسەپسياسىنا سايكەس كەلمەيدى. دەپۋتات جوق، وزدەرىڭىز قوجا، وزدەرىڭىز ءبي. راحات دەگەن سياقتى. سول وزگەرىستەر اياسىندا ءبىر باعدارلاماعا بىرنەشە رەت وزگەرىس ەنگىزىلگەن...

ەندى سۇراق: سول وزگەرىستەردە بيىل قانداي شىعىندار قىسقاردى، ولاردىڭ قانشاسى ينۆەستيسيالىق جوبالاردى ىسكە اسىرۋعا بايلانىستى؟ ەڭ نەگىزگىسى: وسى قىسقارعان باعدارلامالاردى ەرتەڭ دەپۋتاتتارعا قايتادان الىپ كەلىپ، بيۋدجەتكە كىرگىز دەپ ءوتىنىش جاسامايسىزدار ما؟» - دەپ سۇرادى دەپۋتات.

مينيستر بايبازاروۆتىڭ جاۋابى
نۇرلان بايبازاروۆ ساۋالعا جاۋاپ بەردى.

«بۇل - ۇكىمەتتىڭ قۇزىرەتىندەگى سۇراق. بيىل توعىز ەمەس، ون رەت تۇزەتىلدى. جاقىندا تاعى دا تۇزەتۋ ەنگىزدىك. سونىڭ ەسەبىنەن 375 ميللياردتان اسا تەڭگەنىڭ قۇرىلىمىن وزگەرتىپ، ەكونوميكالىق وسىمگە بايلانىستى باعىتتارعا جىبەردىك... ۇنەمدەلگەن قارجى حالىقتىڭ تۇرمىسىن جاقسارتۋعا، ەكونوميكالىق ءوسىمدى ىنتالاندىرۋعا باعىتتالدى»، - دەپ جاۋاپ بەردى نۇرلان بايبازاروۆ.

«بيۋدجەتتىك ءتارتىپ اقساپ جاتىر». قوشانوۆتىڭ رەاكسياسى
ءماجىلىس ءتوراعاسى ەرلان قوشانوۆ دەپۋتات ماسەلەنى دۇرىس كوتەرىپ وتىرعانىن ايتتى.

«بيۋدجەتكە ون رەت وزگەرتۋ جاسادىق دەپ ەرلىك جاساعانداي ايتىپ وتىرسىز. اي سايىن بيۋدجەتكە وزگەرىس ەنگىزىلىپ وتىرعان. ياعني بيۋدجەتتىك ءتارتىپ اقساپ جاتىر دەگەن ءسوز. سولاي عوي؟! دەپۋتاتتىڭ سۇراعى دۇرىس. ۇكىمەت قاپەرىنە الۋى كەرەك»، - دەدى قوشانوۆ.