ەرلەردىڭ جالاقىسى كوپ بولا تۇرا، ايەلدەرگە قاراعاندا اقشاسىن از جاراتادى

استانا. قازاقپارات - الەم ەلدەرىندە دەموگرافيالىق تەپە-تەڭدىك ءارتۇرلى. كەيىنگى وتباسىن قۇرۋ مەن بالالى بولۋ كورسەتكىشى تومەندەگەن ەلدەر سانى ارتقان، دەپ حابارلايدى 24kz.

بۇنىڭ سەبەبى نەدە؟ جەر بەتىندە ءبىر قاراعاندا ايەلدەر كوپ سياقتى. دەگەنمەن، الەمدە 4,10 ميلليارد ەر ادام بار. بۇل جالپى حالىقتىڭ %50,28- ىنە تەڭ. ال، ايەلدەر سانى - 4,06 ميلليارد بۇل تيىسىنشە، حالىقتىڭ %49,72- ىنە تەڭ. دەمەك، الەمدە ەر ادامدار ايەلدەرگە قاراعاندا 45,25 ميلليونعا كوپ. كوپ ەلدە ءار 100 جاڭا تۋعان قىزعا 105 ۇل بالادان كەلەدى.

حالقى ەڭ كوپ ەكى ەل، ءۇندىستان مەن قىتايدا ەرلەر پوپۋلياتسياسى ايتارلىقتاي جوعارى. ءدال وسى ەلدەر الەمدە ەر ادامدار سانىنىڭ تارالۋىن انىقتايدى. سونداي- اق، اراب ەلدەرىندە 100 ايەلگە 247 ەردەن كەلەدى. جار تاڭداۋ تۇگىلى، جار تابۋ قيىن بولىپ كورىنەر. دەگەنمەن، پارسى شىعاناعىنىڭ ەر-ازاماتتارى الەمدە ەڭ كوپ ايەل الاتىندار. ال، يسلانديادا ەرلەر سانىنىڭ باسىم بولعانى سونشالىق، ۇكىمەت ەلگە كەلىپ، يسلانديالىق ازاماتقا تۇرمىسقا شىققان شەتەلدىك قىزدارعا وتەماقى بەرۋگە دايىن.

ەرلەردىڭ %90- ءى قاۋىپتى قىزمەتتە ىستەيدى

ەرلەر سانى جاعىنان ەمەس، ەڭبەك نارىعىندا دا باسىمدىققا يە. ماسەلەن، ەرلەر مەن ايەلدەر اراسىنداعى جالاقى الشاقتىعى - %18,4. مۇنى ساراپشىلار، قاۋىپتى قىزمەت تۇرلەرىمەن بايلانىستىرادى. ا ق ش- تىڭ ەڭبەك ستاتيستيكاسى بيۋروسىنىڭ دەرەگى بويىنشا ەڭ قاۋىپتى ءتورت كاسىپ - بالىق اۋلاۋ، اعاش كەسۋ، تىكۇشاق باسقارۋ، وندىرىستىك الپينيزم سياقتى قىزمەتتەردە جۇمىس ىستەيتىندەردىڭ %90- تەن استامى ەرلەر. ياعني، جىگىتتەردىڭ ايەلدەرگە قاراعاندا جۇمىس ورنىندا مەرت بولۋ ىقتيمالدىعى جوعارى.

ستاتيستيكا بويىنشا 2017 -جىلى الەمدە 4761 ەر جۇمىس ورنىندا قايتىس بولعان. ال ايەلدەر كورسەتكىشى 386 ادامدى قۇرايدى. بالىق اۋلاۋ جانە اڭشىلىق سالاسىنداعى ءولىم-ءجىتىم دەڭگەيى 100000 جۇمىسشىعا 145 ولىمنەن كەلەدى. ەرلەردەگى جالاقى مولشەرىنىڭ كوپ بولۋى وسى فاكتورلارمەن تۇسىندىرىلەدى.

ەرلەر اقشاسىنىڭ كوبىن اشى سۋعا جۇمسايدى

ەرلەردىڭ جالاقىسى كوپ بولا تۇرا، ايەلدەرگە قاراعاندا اقشاسىن از جاراتادى. ايەلدەر از تابادى، ءبىراق كوپ جۇمسايدى. Capital One Shopping Research ستاتيستيكاسى بويىنشا ايەلدەر بۇكىل الەم بويىنشا تۇتىنۋ تاۋارلارىنا شامامەن 35 تريلليون دوللار جۇمسايدى، بۇل الەمدىك تۇتىنۋ شىعىندارىنىڭ %50- ىنە تەڭ. ال، ەر ادامدار الكوگولدى سۋسىندار مەن تەمەكىگە كوپ اقشا جۇمسايدى. قازىر الەمدە 206 ميلليون ادام اشى سۋسىنعا تاۋەلدى. ودان بولاتىن ءولىم-ءجىتىمنىڭ شامامەن ۇشتەن ەكىسى ەرلەر اراسىندا.