ۇرلانعان ساۋساق ىزدەرىن شەتەلدىك ارناۋلى بارلاۋ قىزمەتتەرى ساتىپ الۋى مۇمكىن - ساراپشى

ۇرلانعان ساۋساق ىزدەرىن شەتەلدىك ارناۋلى بارلاۋ قىزمەتتەرى ساتىپ الۋى مۇمكىن. بۇل تۋرالى CBAP جەتەكشى بيزنەس ساراپشىسى الماس نۇرجانوۆ ايتتى، دەپ حابارلايدى قازاقپارات ءتىلشىسى.

«ۇرلانعان ساۋساق ىزدەرى بيومەتريالىق جۇيەلەرمەن قورعالعان قۇرىلعىلارعا كىرۋ ءۇشىن قولدانىلۋى مۇمكىن. ايتالىق، حاكەر ۇرلانعان ساۋساق ءىزىن سيفرلىق امياندى نەمەسە بانكتىك ەسەپشوت پەن كرەديت كارتاسىن بۇعاتتان اجىراتۋ ءۇشىن قولدانا الادى. سونىمەن قاتار ساۋساق ىزدەرى داركنەتتە (اعىلشىننىڭ DarkNet ءسوزى «جاسىرىن جەلى»، «كۇماندى ينتەرنەت، جەلى»، «كولەگەيلى جەلى، ۆەب» دەگەن ماعىنا بىلدىرەدى) ساتىلۋى ىقتيمال. جەلىدە كوپتەگەن استىرتىن نارىق بار. وندا ۇرلانعان جەكە دەرەكتەردى ساتۋعا بولادى. اتالعان الاڭداردا شەتەلدىك ارناۋلى بارلاۋ قىزمەتتەرىنىڭ دە ساتىپ الۋشى بولاتىندىعى قۇپيا ەمەس. ال بيومەتريالىق دەرەكتەر ۇلتتىق قاۋىپسىزدىك ءۇشىن اسا ماڭىزدى»، - دەدى ساراپشى اگەنتتىك تىلشىسىنە بەرگەن سۇحباتىندا.

ونىڭ اتاپ وتۋىنشە، كوپتەگەن ەلدە بيومەتريالىق دەرەكتەر سايكەستەندىرۋدەن باستاپ، داۋىس بەرۋگە دەيىنگى ءتۇرلى ماقساتتا قولدانىلادى.

«ماسەلەن، ا ق ش- تا يمميگراتسيالىق ەمەس ۆيزامەن ەلگە كەلگەن بارلىق شەتەلدىك ازاماتتان ساۋساق ءىزى الىنادى. البانيا 2021-جىلى ساۋساق ىزىمەن داۋىس بەرۋدى ەنگىزدى»، - دەدى الماس نۇرجانوۆ.

ەستەرىڭىزگە سالا كەتەيىك، 2024-جىلدىڭ 1- قاڭتارىنان باستاپ پاسپورت پەن جەكە كۋالىكتى راسىمدەۋ كەزىندە ازاماتتاردان ساۋساق ءىزى الىنادى.