ەرلان قارين: ۇلتتىق بىرەگەيلىك پەن بىرلىكتىڭ بىردەن ءبىر نەگىزى - تۇتاستىق
استانا. KAZINFORM - قازاقستاننىڭ ۆيتسە-پرەزيدەنتى ەرلان قارين پرەزيدەنتتىڭ قازاقتاردى بولمەۋ تۋرالى ءسوزىن قولدادى. ول قازاق قوعامىنداعى ەسكى كوزقاراستاردان ارىلۋعا شاقىردى.
- مەملەكەت باسشىسى قاسىم-جومارت توقايەۆ بۇگىن قازاقستان حالىق كەڭەسىنىڭ ءبىرىنشى سەسسياسىنا قاتىستى. جيىندا ءبىر ساعاتتان استام ۋاقىت ءسوز سويلەدى. ءبىرقاتار تاقىرىپتاردى قامتىپ، ءوز وي-پىكىرىن ورتاعا سالدى. كوپتەگەن ازامات بايقاعان بولار، پرەزيدەنت سوڭعى ۋاقىتتا سويلەگەن سوزدەرىنىڭ بارلىعىندا ەلدى ەلەڭ ەتكىزەر، تالقىعا تۇرتكى بولار ويلارىن اشىق ايتىپ ءجۇر. وسىعان دەيىن پرەزيدەنتتىڭ تاريحتى تەك قاسىرەت رەتىندە كورسەتۋ، جاڭا ادەپتەردى قالىپتاستىرۋ، تازالىقتى ساقتاۋ تۋرالى پىكىرلەرى قوعامدا قىزۋ تالقىلانعانىن بىلەمىز، - دەپ جازدى ول instagram-داعى پاراقشاسىندا.
ەرلان قارين قوعامدى تەجەيتىن ەسكى نارراتيۆتەردەن باس تارتۋ كەرەك ەكەنىن ايتتى.
- مەملەكەت باسشىسى بۇگىن دە اۋىل مەن قالانى بولمەۋ، ادامداردى «اسفالتتا» وسكەن قازاقتار، شالا قازاقتار، ناعىز قازاقتار دەپ الالاماۋ تۋرالى ويىمەن ءبولىستى. مۇنىڭ ءبارى كەزىندە قالىپتاسىپ كەتكەن، بۇگىندە ابدەن ەسكىرگەن، ۇلتتىڭ دامۋىنا كەرى اسەر ەتەتىن نارراتيۆتەر. شىن مانىندە، پرەزيدەنت كوپشىلىكتىڭ كوكەيىندە جۇرگەن دۇنيەنى ايتتى دەپ ويلايمىن. ونى حالىق كەڭەسىنىڭ جيىنىنا قاتىسقان ادامداردىڭ قۇپتاپ، قولداعانىنان-اق بايقاۋعا بولادى، - دەدى ۆيتسە-پرەزيدەنت.
ول ۇلتتىق بىرەگەيلىك پەن بىرلىكتىڭ بىردەن ءبىر نەگىزى - تۇتاستىق، ياعني، ازاماتتاردى ءبولىپ-جارماۋ، جىك-جىككە بولمەۋ ەكەنىن العا تارتتى.
- مەملەكەت باسشىسى بۇگىنگى جيىنداعى وي-پىكىرى ارقىلى قوعامدا ورنىققان كەيبىر ۇستانىمدار مەن جەكەلەگەن قۇندىلىقتاردى قايتا قاراۋ كەرەك ەكەنىن اڭعارتتى. راسىندا، ۇلتتىڭ جاڭا ساپاسىن قالىپتاستىرىپ، بىرەگەيلىگىمىزدى ودان ءارى نىعايتامىز دەسەك، قوعامنىڭ دامۋىن تەجەيتىن كەيبىر ەكىۇشتى كوزقاراستاردان باس تارتقان ابزال. ۇلتتىق بىرەگەيلىك پەن بىرلىكتىڭ بىردەن ءبىر نەگىزى - تۇتاستىق، ياعني، ازاماتتاردى ءبولىپ-جارماۋ، جىك-جىككە بولمەۋ. سوندىقتان پرەزيدەنت ايتقان ويدىڭ تۇپكى ءمانى ۇلتتىق مەنتاليتەت پەن پسيحولوگيادا قالىپتاسىپ كەتكەن وسىنداي كەسەلدەردەن ارىلۋ كەرەكتىگىندە بولىپ تۇر. مۇنى دا ەندىگى جەردە نازارعا الۋعا ءتيىسپىز، - دەپ تۇيىندەدى قارين.
وسىدان بۇرىن قازاقستان حالىق كەڭەسىنىڭ ءبىرىنشى سەسسياسىندا پرەزيدەنت قاسىم-جومارت توقايەۆ قاراڭعىلىقتان باسقا بەرەرى جوق ەسكىلىك ۇستانىمدارىنا قاتاڭ توسقاۋىل قويۋىمىز كەرەك ەكەنىن ايتقان ەدى.
