ەرلان قارين ەڭبەك ادامدارىنىڭ جەتىستىگىن تۇراقتى ناسيحاتتاۋدى تاپسىردى
استانا. KAZINFORM - ۆيتسە-پرەزيدەنت يدەولوگيالىق كەڭەستىڭ كەزەكتى وتىرىسىن وتكىزدى. بۇل تۋرالى اقوردانىڭ باسپا ءسوز قىزمەتى حابارلادى.
اقوردادا ۆيتسە-پرەزيدەنت ەرلان قاريننىڭ توراعالىعىمەن يدەولوگيالىق كەڭەستىڭ كەزەكتى وتىرىسى ءوتتى. جيىنعا پرەزيدەنت اكىمشىلىگى قۇرىلىمدىق بولىمشەلەرىنىڭ جانە الەۋمەتتىك-مادەني جانە اقپاراتتىق بلوكتارعا جەتەكشىلىك ەتەتىن ورتالىق مەملەكەتتىك ورگانداردىڭ باسشىلارى قاتىستى.
وتىرىستا ىشكى ساياساتتىڭ قازىرگى كۇن ءتارتىبى قارالىپ، الداعى ۋاقىتتا وتەتىن ەڭبەك كۇنى سەكىلدى نەگىزگى ءىس-شارالارعا دايىندىق بارىسى ەگجەي-تەگجەيلى پىسىقتالدى.
ۆيتسە-پرەزيدەنت قوعامدا ەڭبەكقورلىق پەن وركەندەۋ يدەولوگياسىن ىلگەرىلەتۋ باعىتىنداعى قارقىندى جۇمىستى جالعاستىرۋ قاجەت ەكەنىن ايرىقشا اتاپ ءوتتى.
- مەملەكەت كونستيتۋتسيالىق قۇندىلىقتاردى جان-جاقتى ىلگەرىلەتۋدە. بۇل قاتاردا ەڭبەكقورلىق پەن پروگرەسس، جۇمىسشى ماماندىقتار وكىلدەرىنە قۇرمەت كورسەتۋ دە بار. پرەزيدەنت قاسىم-جومارت توقايەۆ جاسامپاز ەڭبەك يدەولوگياسىن ناسيحاتتاۋعا ايرىقشا ءمان بەرىپ، ءوز ءىسىنىڭ مايتالماندارىن، ەڭبەك اۋلەتتەرىنىڭ وكىلدەرىن جوعارى مەملەكەتتىك ناگرادالارمەن ماراپاتتاپ كەلەدى.
وسى ورايدا، اقپاراتتىق كەڭىستىكتە ەڭبەك ادامدارىنىڭ جەتىستىكتەرى مەن عۇمىر جولىن ۇنەمى ناسيحاتتاپ، ولاردىڭ ەلىمىزدىڭ وزىق دامۋىنا قوسىپ وتىرعان ۇلەسىن اتاپ كورسەتكەن ءجون. وتاندىق IT- جوبالاردىڭ، ستارتاپتاردىڭ تابىستى ناتيجەلەرىنە، جاڭا سيفرلىق تەحنولوگيالاردىڭ ەنگىزىلۋىنە ايرىقشا نازار اۋدارۋ قاجەت. بۇل جۇمىس بەلگىلى ءبىر ءىس-شارالارمەن عانا شەكتەلمەي، تۇراقتى ءارى جۇيەلى تۇردە جۇرگىزىلۋگە ءتيىس.
- تۇپكى ماقسات - پرەزيدەنت ايقىنداپ بەرگەندەي، ەڭبەكقورلىقتى ۇلتتىق سيپاتىمىزدىڭ اجىراماس بولىگىنە اينالدىرۋ، - دەدى ەرلان قارين.
كەڭەس قورىتىندىسى بويىنشا ۆيتسە-پرەزيدەنت جاۋاپتى مەملەكەتتىك ورگاندارعا ىشكى ساياساتتىڭ قازىرگى كۇن تارتىبىنە قاتىستى ناقتى تاپسىرمالار بەردى. سونداي- اق مەملەكەت باسشىسىنىڭ بارلىق باستاماسى مەن تاپسىرماسىنىڭ ءتيىمدى ىسكە اسىرىلۋىن قامتاماسىز ەتىپ، ولاردىڭ ورىندالۋىن باقىلاۋدى ودان ءارى جالعاستىرۋ قاجەت ەكەنىن ايتتى.
