راقىمشىلىق: قىلمىستىق جاۋاپكەرشىلىكتەن كىمدەر بوساتىلادى
استانا. KAZINFORM - ىشكى ىستەر ءمينيسترىنىڭ ورىنباسارى سانجار ءادىلوۆ ەلىمىزدەگى قىلمىستى راقىمشىلىقتىڭ الدىن الا ادىستەرى ازىرلەنگەنىن ايتتى.
سانجار ءادىلوۆتىڭ ايتۋىنشا، قىلمىستىق تەرىس قىلىق جاساعان، ونشا اۋىر ەمەس قىلمىس جانە زيانسىز ورتاشا اۋىرلىقتاعى قىلمىس جاساعان ادامداردى قىلمىستىق جاۋاپكەرشىلىكتەن بوساتۋ جوسپارلانعان.
مۇنداي ءتاسىل ءدال سونداي ساناتتاعى قىلمىستار ءۇشىن باس بوستاندىعىنان ايىرۋ ورىندارىندا جازاسىن وتەپ جاتقان، كەلتىرىلگەن زيان وتەلگەن سوتتالعاندارعا دا قولدانىلاتىن بولادى.
سونىمەن قاتار راقىمشىلىق مىناداي قىلمىستاردى جاساعان ادامدارعا قولدانىلمايدى:
- ەكسترەميستىك جانە تەرروريستىك سيپاتتاعى قىلمىستار؛
- ازاپتاۋ؛
- سىبايلاس جەمقورلىق قۇقىق بۇزۋشىلىقتار؛
- كامەلەتكە تولماعانداردىڭ جىنىستىق قول سۇعىلماۋشىلىعىنا قارسى قىلمىستار.
— قاماۋدا بولۋىنىڭ سوڭعى جىلى قالعان، باس بوستاندىعىنان ايىرۋ ورىندارىندا وتىرعان ادامدارعا دا راقىمشىلىق قولدانىلادى. قازىرگى ۋاقىتتا ءبىرىنشى تەرىس دارەجەسى بار ادامدارعا راقىمشىلىق قولدانباۋ ماسەلەسىن قاراستىرىپ جاتىرمىز. اۋىر جانە اسا اۋىر قىلمىستارعا كەلەتىن بولساق، جوعارىدا اتالعانداردان باسقا جازانىڭ وتەلۋ مەرزىمىن قىسقارتۋ ماسەلەسىن قاراستىرىپ جاتىرمىز. جالپى العاندا مەرزىمنىڭ بەستەن ءبىر بولىگىنە قىسقارتۋ كوزدەلۋدە، — دەدى سانجار ءادىلوۆ.
سونداي-اق اكىمشىلىك راقىمشىلىق ماسەلەسى دە پىسىقتالىپ جاتىر. مينيستر ورىنباسارىنىڭ ايتۋىنشا، ۆەدومستۆوارالىق توپتاردىڭ جۇمىسى جالعاسۋدا. كەلەسى اپتادا نەعۇرلىم ناقتى تاسىلدەر ۇسىنۋ جوسپارلانعان.
ول اكىمشىلىك الدىن الۋ جۇيەسىنە 70-تەن استام مەملەكەتتىك ورگان تارتىلعانىن، ولاردىڭ 15- ءى ءوز قۇزىرەتى شەگىندە راقىمشىلىق قولدانۋ مۇمكىندىگىنە قاتىستى ۇسىنىستار بەرگەنىن اتاپ ءوتتى.
بۇعان دەيىن ەلىمىزدە 17 مىڭ ادامعا راقىمشىلىق جاريالانۋى مۇمكىن ەكەنىن جازعان ەدىك.
