قىزىلوردادا بيىل العاش رەت قالىڭ قار جاۋدى
وبلىس ورتالىعى - قىزىلوردا قالاسىندا بۇگىن تاڭەرتەڭ العاش رەت قالىڭ قار جاۋدى. بيىل مۇنداي كولەمدە ازىرگە قالىڭ قار جاۋماعان ەدى.
ال وبلىستىڭ سولتۇستىگىندە ورنالاسقان ارال مەن قازالى اۋداندارىندا قار قاڭتار ايىنىڭ العاشقى اپتاسىندا جاۋدى.
وبلىس ورتالىعىنىڭ تۇرعىندارى جاڭا جىل مەيرامىن قارسىز قارسى الدى.
«قازگيدرومەت» قىزىلوردا فيليالىنىڭ ءبولىم باسشىسى ايگەرىم جوكەلوۆانىڭ ايتۋىنشا، 24 -قاڭتاردا قىزىلوردا قالاسىندا قالىڭدىعى 1-2 سانتيمەتر قار جاۋعان.
بۇگىنگى جاۋعان قار 5 سانتيمەترگە جەتتى. بۇدان كەيىن قار 28-29- قاڭتار كۇندەرى جاۋادى دەپ بولجانىپ وتىر.
«كەيىنگى جىلداردا سىر وڭىرىندە قار از جاۋاتىن بولىپ ءجۇر. بۇرىن قاردىڭ ءتۇسۋى قازان-قاراشا ايلارىندا كورىنىس بەرەتىن ەدى. بۇگىندە اۋا رايىنىڭ جىلىنۋى بايقالا باستادى. وعان كليماتتىڭ جىلىنۋ جاعدايى اسەرىن تيگىزەدى دەگەن ويدامىن»، - دەيدى قىزىلوردا قالاسىنىڭ تۇرعىنى تورەگەلدى ماۋلەنقۇلوۆ.
ەسكە سالساق، بۇدان بۇرىن تۇركىستاندى قار باسىپ قالعانىن حابارلاعان ەدىك.
اۆتور
ءادىلجان ۇمبەت
