قىزىلشا جۇقتىرعان بالالاردىڭ 83 پايىزى ەكپە الماعان - مينيسترلىك
استانا. KAZINFORM - جاڭا جىل باستالعالى ەل اۋماعىندا 64 قىزىلشا جۇقتىرۋ جاعدايى تىركەلدى. بۇل تۋرالى دەنساۋلىق ساقتاۋ مينيسترلىگى سانيتارلىق-ەپيدەميولوگيالىق باقىلاۋ كوميتەتىنىڭ ءتوراعاسى سارحات بەيسەنوۆا ءمالىم ەتتى.

- ەلدەگى ەپيدەميولوگيالىق جاعدايدى تۇراقتاندىرۋعا 5 جاسقا دەيىنگى بالالار مەن مەديتسينا قىزمەتكەرلەرىنە قوسىمشا جاپپاي يممۋنداۋ جۇرگىزۋ ىقپال ەتتى. ونىڭ شەڭبەرىندە قىزىلشاعا، قىزامىققا جانە پاروتيتكە قارسى ۆاكسينا ساتىپ الۋعا ۇكىمەت رەزەرۆىنەن بولىنگەن قاراجات (4,6 ميلليارد تەڭگە) ەسەبىنەن 1,5 ميلليون ادام ەكپە الدى. بۇل اۋرۋشاڭدىق دەڭگەيىن %99,2 عا تومەندەتۋگە مۇمكىندىك بەردى، - دەدى سارحات بەيسەنوۆا ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
ونىڭ ايتۋىنشا، جىل باسىنان بەرى 64 قىزىلشا جۇقتىرۋ جاعدايى تىركەلدى.
- قىزىلشا ەكپە الماعان بالالار ەسەبىنەن تىركەلدى. بۇل - سىرقاتتانعان بالالار سانىنىڭ %83 دان استامى. بۇگىندە جۇرگىزىلىپ جاتقان پروفيلاكتيكالىق جانە ەپيدەمياعا قارسى ءىس-شارالاردىڭ ارقاسىندا ەلدە كوكجوتەل بويىنشا ەپيدەميولوگيالىق جاعداي تۇراقتاندى، ياعني سىرقاتتانۋ جاعدايى %73 عا تومەندەۋ ءۇردىسى بايقالادى. جىل باستالعالى كوكجوتەلدىڭ 55 جاعدايى تىركەلدى، - دەپ تولىقتىردى كوميتەت باسشىسى.
بۇعان دەيىن حابارلاعانىمىزداي، جىل باسىنان بەرى 51 ادام كوروناۆيرۋس جۇقتىردى.