قىتايلىق ينۆەستورلار ۇلىتاۋ وبلىسىنان زاۋىت اشۋعا اقشا قۇياتىن بولدى

ۇلىتاۋ وبلىسىنىڭ ۇلىتاۋ اۋدانى جەزدى كەنتىندە كرەمني زاۋىتى سالىنادى. جوبا قازاقستان مەن قىتاي اراسىنداعى ىسكەرلىك بايلانىس نەگىزىندە ىسكە اسىرىلماق.

وسى ماقساتتا قىتايلىق ينۆەستورلار كەندى ولكەگە كەلدى. اكادەميك قانىش ساتبايەۆتىڭ باسشىلىعىمەن 2-دۇنيەجۇزىلىك سوعىس جىلدارى مارگانەتس كەن ورنىن جەدەل يگەرۋ قاجەتتىلىگىنە بايلانىستى ىرگەسى قالانعان جەزدى كەنتى اۋدان ورتالىعى دا بولعان ەدى.

جەزدى اۋدانىنىڭ تاراتىلۋىنا بايلانىستى ونەركاسىبى تۇرالاپ قالعان كەنتتە كرەمني زاۋىتىنىڭ سالىنۋى ولكە ەكونوميكاسىنىڭ جاڭا تىنىسىن اشقانداي بولدى.

زاۋىت سالۋ يدەياسى اۋىل اقساقالدارىمەن بىرگە قوعامدىق تىڭداۋدا تالقىلاندى. وعان جەرگىلىكتى بيلىك وكىلدەرى مەن «اتامەكەن» وڭىرلىك كاسىپكەرلەر پالاتاسى فيليالىنىڭ ديرەكتورى امانبەك سۇلەيمەنوۆ، جاڭادان اشىلاتىن «ۇلىتاۋ كرەمني» ج ش س- ءنىڭ ديرەكتورى عالىمجان دارجانوۆ، سونىمەن قاتار سەرىكتەستىكتىڭ ينجەنەر-تەحنولوگى شاو حانمينگ پەن قارجىلىق ديرەكتورى مي رونگ تا قاتىستى.

بۇل كاسىپورىن قازاقستان مەن قىتاي اراسىنداعى جاڭا جوبا بولادى جانە ءوندىرىس ورنىنىڭ اشىلۋى ءوڭىردىڭ الەۋمەتتىك-ەكونوميكالىق دامۋىنا ۇلكەن ۇلەس قوسادى دەپ سەنىم ءبىلدىرىپ وتىرمىز. جاڭا زاۋىتتىڭ قۇرىلىسىن باستاۋعا رۇقساتتى حالىق بەرەدى. ءبىز سىزدەردىڭ كەلىسىمدەرىڭىزگە بايلانىستى ارەكەت ەتەتىن بولامىز، - دەدى ۇلىتاۋ اۋدانى اكىمىنىڭ ورىنباسارى الماز قايىربەك.

زاۋىت جوباسىن كەنت تۇرعىندارى ءبىراۋىزدان قولدادى. تەك ەكولوگيالىق پروبلەمالاردىڭ تۋماۋىنا باسا نازار اۋدارۋدى سۇرادى. ينۆەستورلاردىڭ ايتۋىنشا، جۇمىس بارىسىندا قورشاعان ورتاعا شاڭ-توزاڭ، زياندى قالدىقتار بولىنبەيدى. ويتكەنى زاۋىتقا شاڭدى فيلترلەۋ جۇيەسى ورناتىلادى. ءوندىرىس قالدىقتارىن ىسكە اسىرۋ ءۇشىن بولاشاقتا سەمەنت، كىرپىش زاۋىتىن سالۋ دا جوسپارلانعان.

جوبانىڭ جالپى قۇنى - 7,5 ميلليارد تەڭگە. ونىڭ 80 پايىزىن ءبىز، 20 پايىزىن قىتايدان كەلگەن سەرىكتەستەرىمىز بەرەدى دەپ جوسپارلانعان. ماقساتىمىز - وسى ايماقتا كرەمني زاۋىتىن سالۋ. جىلىنا 15 مىڭ توننا ءونىم وندىرمەكپىز. كرەمنيدى شيكىزات كۇيىندە ءوندىرىپ، ونى دايىن ءونىم كۇيىندە شىعارعىمىز كەلەدى، - دەدى « ۇلىتاۋ كرەمني» ج ش س- ءنىڭ ديرەكتورى عالىمجان دارجانوۆ.

جيىندا قىتايدان كەلگەن ينجەنەر-تەحنولوگ شاو حانمينگ زاۋىت سالۋعا رۇقسات بەرىلسە، 200 گە جۋىق جاڭا جۇمىس ورنىن اشۋدى جوسپارلاپ وتىرعاندارىن ايتتى.

قىتايدان 40 قا جۋىق مامان شاقىرتامىز، 160 ورىن جەرگىلىكتى تۇرعىندارعا بەرىلەدى. قىتايلىق ماماندار جاڭا تەحنولوگيانى ۇيرەتۋ ماقساتىمەن كەلەدى. زاۋىتتىڭ ارنايى كەڭسەسى مەن قىزمەتكەرلەرگە ارنالعان جاتاقحاناسىن دا سالۋ جوسپارلانعان، - دەدى شاو حانمينگ.

اۋدان پروكۋرورى راحىمجان كوشكىنباي ۇلى ءوز كەزەگىندە ەكى ەل ازاماتتارىنىڭ جالاقىسى تەڭ بولۋى كەرەكتىگىن جانە زاۋىت قۇرىلىسىنىڭ زاڭ شەڭبەرىندە ىسكە اسۋىن قاداعالايتىنىن جەتكىزدى. اۋداندىق كاسىپكەرلىك جانە ونەركاسىپ ءبولىمىنىڭ باسشىسى گۇلنار اۋعانوۆا شەتەل ازاماتتارىنىڭ قازاقستاندا جۇمىس ىستەۋى ءۇشىن ۇكىمەت تاراپىنان ارنايى كۆوتا بولىنەتىنىن، ونى الۋ ءبىرشاما ۋاقىتتى قاجەت ەتەتىن جۇمىس ەكەنىن ايتتى.

سونىمەن، جەزدى كەنتىندەگى جاڭا زاۋىتتىڭ قۇرىلىسى كەلەسى جىلى اياقتالىپ، 1- تامىزىندا ىسكە قوسىلادى دەپ جوسپارلانىپ وتىر.

halyq-uni.kz