قىتايلىق جانكۇيەرلەر ليونەل مەسسيگە وكپەلەپ قالدى
استانا. قازاقپارات - 4- اقپاندا گونكونگتە وتكەن ماۋسىم الدىنداعى جولداستىق كەزدەسۋدە قىتايلىق جانكۇيەرلەر ليونەل مەسسي الاڭعا شىعا الماعانى ءۇشىن امەريكالىق «ينتەر مايامي» كومانداسىن ايىپتادى.
امەريكالىق ينتەر مايامي كومانداسى وتكەن اپتادا گونكونگكە كەلىپ، تۇرعىنداردىڭ ىستىق ىقىلاسىنا بولەندى. بۇل نەگىزىنەن اتاقتى جۇلدىز مەسسيدىڭ وسى كوماندانىڭ مۇشەسى بولۋىمەن بايلانىستى. كوپتەگەن جانكۇيەرلەر مەسسيدى الاڭدا تاماشالاۋدى اسىعا كۇتەدى، سوندىقتان ويىن بيلەتتەرى ەرتە ساتىلىپ كەتتى.
ويىننىڭ بيلەتتەرى وتكەن جىلدىڭ جەلتوقسان ايىندا ساتىلا باستادى، باعاسى 880 گونكونگ دوللارىنان 4880 گونكونگ دوللارىنا دەيىن (شامامەن 113 ا ق ش دوللاردان 624 ا ق ش دوللارىنا دەيىن) بولدى.
جەكسەنبى كۇنى وتكەن «ينتەر مايامي» مەن گونكونگ اراسىنداعى جولداستىق كەزدەسۋدى بارلىعى 40000 جانكۇيەر تاماشالادى. جانكۇيەرلەردىڭ باسىم كوپشىلىگى بۇل جەرگە مەسسيدى ءوز كوزدەرىمەن كورۋ ءۇشىن كەلگەن. الايدا مەسسي ويىندى تولىق وتكىزگەن جوق. سپورتشى پالتوسىن شەشپەي، بۇكىل ۋاقىت بويى شەتتە وتىردى جانە ويناۋعا نيەتى بولمادى.
جەلىدە تاراعان ۆيدەودا، ويىننان كەيىنگى ماراپاتتاۋ ءراسىمى كەزىندە مەسسيدىڭ ماراپاتتاردى تاپسىرىپ جاتقان گونكونگ ۇكىمەتىنىڭ شەنەۋنىكتەرىنەن ادەيى جالتارىپ، بۇل شەنەۋنىكتەرمەن قول الىسۋدان نەمەسە سويلەسۋدەن باس تارتقانىن كورسەتتى.
مەسسي ءتىپتى ماتچتان كەيىنگى فوتوسەسسيا كەزىندە كامەراعا تۇسپەۋ ءۇشىن ويىنشىنىڭ ارتىنا ادەيى جاسىرىنىپ قالعان.
كەيىنىرەك ينتەر مايامي باپكەرى مەسسيدىڭ «جاراقاتقا بايلانىستى» ويناي المايتىنىن ايتتى.
مەسسيدىڭ ءوزى ەشقانداي تۇسىنىكتەمە بەرمەدى جانە ويىننان كەيىن جانكۇيەرلەرمەن كەزدەسۋ وتكىزۋ تۋرالى ۇسىنىستى قابىلدامادى.
مەسسيدىڭ بۇل ارەكەتى قىتايلىق جانكۇيەرلەردىڭ اشۋىن تۋدىردى. كوپتەگەن جانكۇيەرلەر ويىن الاڭىنان شىعىپ بارا جاتىپ «وتىرىكشى» دەپ ايقايلاپ، بيلەتتەرىنىڭ قۇنىن قايتارۋدى تالاپ ەتتى.
قىتايدىڭ گونكونگ قالاسىنداعى ب ا ق- تىڭ حابارلاۋىنشا، مەسسي الاڭعا شىقپاعانى تۋرالى 38 شاعىم تۇسكەن، ونىڭ 29 ى جەرگىلىكتى تۇتىنۋشىلاردان جانە 9 ى شەتەلدىك تۋريستەردەن، قايتارۋ سۇراۋدىڭ جالپى سوماسى 210 مىڭنان استام گونكونگ دوللارىنا تاياۋ.
جولداستىق كەزدەسۋگە قوماقتى قارجىلاي دەمەۋشىلىك كورسەتكەن گونكونگ ۇكىمەتى دە ءوز نارازىلىعىن ءبىلدىردى. گونكونگ ۇكىمەتى، سونداي- اق، كەيبىر دەمەۋشىلىك قاراجاتتى قايتارىپ الۋ مۇمكىندىگىن قاراستىراتىنىن حابارلادى.
ونىڭ قىتايداعى ارەكەتىنەن ەرەكشە ايىرماشىلىعى، جاپونياعا كەلگەننەن كەيىنگى مەسسيدىڭ كوزقاراسى بولدى. اقپاننىڭ 5 ى كۇنى كەشكە جاپونيانىڭ توكيو قالاسىنا كەلگەن مەسسي اۋەجايدا ءوزىن قارسى العان جاپون جانكۇيەرلەرىن كۇلىمدەپ، قول بۇلعادى.
سول كۇنى مەسسي ماتچ الدىنداعى باسپا ءسوز ءماسليحاتىنا قاتىسىپ، «مەن توكيوعا وسى ويىنعا قاتىسۋ ءۇشىن كەلگەنىمە وتە قۋانىشتىمىن»، - دەدى.
شارت بويىنشا ينتەر مايامي 7-اقپاندا J- ليگانىڭ ۆيسسەل كوبە كومانداسىمەن وينايدى.
اۆتور
مۇقتار مۇرات
